Trump-i paralajmëron pas takimit me Netanyahu-n, Hamasi "do të përballet me ferrin" nëse nuk çarmatoset
Donald Trump paralajmëroi se Hamasi do të përballet me “pasoja shumë të rënda” nëse nuk çarmatoset, duke i dhënë mbështetje të plotë kryeministrit izraelit Benjamin Netanyahu pas takimit të tyre në Florida.
Netanyahu njoftoi se do t’i japë Trump-it Çmimin e Izraelit, nderimi më i lartë civil i vendit, ndërsa SHBA-ja po përpiqet të shtyjë përpara fazën e dytë të planit të paqes për Gazën pas armëpushimit të tetorit.
Megjithëse Trump-i fajësoi vetëm Hamasin për bllokimin e procesit, grupi militant refuzon çarmatosjen, ndërsa situata në Gaza mbetet e paqëndrueshme dhe me viktima të vazhdueshme.
Zelensky thotë se Kievi nuk mund të fitojë pa mbështetjen e SHBA-së, ndërsa Putin-i urdhëron avancimin në Zaporizhzhia
Zelensky deklaroi se Ukraina nuk mund ta fitojë luftën kundër Rusisë pa mbështetjen e SHBA-së, duke i quajtur “gënjeshtra tipike ruse” pretendimet e Kremlinit për një sulm ukrainas ndaj rezidencës së Vladimir Putin-it dhe duke akuzuar Moskën se po sabotonte përpjekjet për paqe.
Ai e cilësoi produktiv takimin e tij me Donald Trump-in, por theksoi se nuk i beson Putin-it dhe se Rusia nuk dëshiron sukses për Ukrainën.
Ndërkohë, Putin-i urdhëroi avancim të mëtejshëm në rajonin e Zaporizhzhias, ku forcat ruse pretendojnë se po afrohen me qytetin kryesor, ndërsa Rusia këmbëngul se ka iniciativën strategjike në fushën e betejës.
Arabia Saudite bombardon Jemenin për shkak të dërgesës së armëve që pretendon se Emiratet e Bashkuara Arabe u kanë dërguar separatistëve
Arabia Saudite bombardoi portin jemenas të Mukallës, duke pretenduar se aty kishte mbërritur një ngarkesë armësh nga Emiratet e Bashkuara Arabe për forcat separatiste* të Këshillit Tranzitor Jugor.
Sulmi shënon një përshkallëzim të ri të tensioneve mes Riadit dhe separatistëve të mbështetur nga Emiratet, si dhe thellon përçarjen mes dy aleatëve në luftën e gjatë të Jemenit kundër rebelëve Huthi.
Arabia Saudite tha se goditjet kishin për qëllim neutralizimin e një kërcënimi të menjëhershëm, ndërsa Emiratet nuk reaguan menjëherë ndaj akuzave.
*Forcat separatistet janë grupe ose lëvizje që kërkojnë të shkëputen nga një shtet dhe të krijojnë një shtet apo administratë të veçantë.
Zbulohen dy nënlloje të reja të sklerozës multiple falë inteligjencës artificiale
Shkencëtarët, duke përdorur inteligjencën artificiale, kanë zbuluar dy nënlloje të reja biologjike të sklerozës multiple, duke hapur rrugën për trajtime më të personalizuara.
Zbulimi u bazua në analiza gjaku, skanime MRI dhe të dhëna nga 600 pacientë, duke identifikuar një formë më agresive që shfaq dëmtime herët dhe një tjetër më të ngadaltë ku dëmtimet shfaqen më vonë.
Ekspertët thonë se ky përparim mund të revolucionarizojë trajtimin e sklerozës multiple duke u fokusuar te biologjia e sëmundjes, jo vetëm te simptomat.
