Macron dhe Abbas njoftojnë panelin për hartimin e kushtetutës së re të Palestinës
Pas takimit në Paris, Emmanuel Macron dhe Mahmoud Abbas njoftuan krijimin e një paneli të përbashkët për hartimin e kushtetutës së re të Palestinës, si hap drejt konsolidimit të shtetit palestinez.
Franca, që prej shtatorit ka njohur zyrtarisht shtetin e Palestinës, e konsideron reformimin kushtetues thelbësor për ndërtimin e një shteti demokratik dhe sovran.
Takimi shkaktoi reagime të ashpra nga Izraeli, që akuzoi Abbas-in për “manipulim politik” dhe përdorim të fondeve europiane për interesa personale.
Ministrat e Jashtëm të G7 takohen në Kanada për bisedime
Ministrat e Jashtëm të G7 u mblodhën në Kanada për të diskutuar mbi tregtinë, shpenzimet e mbrojtjes, luftën në Ukrainë dhe planin e armëpushimit të Donald Trump në Gaza.
Takimi u zhvillua mes tensioneve të shtuara midis SHBA-së dhe aleatëve tradicionalë për tarifat tregtare dhe qasjen ndaj konflikteve globale.
Pavarësisht përplasjeve, vendet e G7 riafirmuan mbështetjen për Ukrainën dhe theksuan nevojën për një armëpushim të qëndrueshëm në Lindjen e Mesme.
BE-ja do të zhvendosë azilkërkuesit nga Spanja, Italia, Greqia dhe Qiproja në shtete të tjera anëtare
Komisioni Europian ka vlerësuar se Spanja, Italia, Greqia dhe Qiproja janë nën “presion migrator”, ndaj azilkërkuesit nga këto vende do të zhvendosen në shtete të tjera të BE-së në vitin 2026.
Shtetet që nuk përballen me flukse të larta migracioni duhet të pranojnë një numër azilkërkuesish ose të paguajnë 20 mijë euro për çdo person që nuk pranojnë.
Polonia, Hungaria dhe Sllovakia kanë refuzuar të zbatojnë këtë mekanizëm solidariteti, gjë që mund t’i përballë me shkelje të ligjit të BE-së.
Prokurorët e Milanos hetojnë dyshimet për "turizëm snajperësh" gjatë luftës në Bosnjë
Prokuroria e Milanos ka hapur një hetim ndaj disa shtetasve italianë që dyshohet se kanë paguar ushtarë serbë për të udhëtuar në Sarajevë gjatë luftës në Bosnje, me qëllim që të qëllonin mbi civilët gjatë rrethimit të qytetit.
Hetimi nisi pas një kallëzimi të shkrimtarit Ezio Gavazzeni, i cili mblodhi dëshmi pas shfaqjes së dokumentarit Sarajevo Safari, ku pretendohej se “turistë snajperë” nga vendet perëndimore kishin marrë pjesë në masakra për argëtim.
Autoritetet italiane po hetojnë akuzat për vrasje me dashje dhe motive çnjerëzore, ndërsa disa prej personave të dyshuar pritet të merren në pyetje javët e ardhshme.
