BE akuzohet se po ushqen luftën e Putin duke importuar gaz natyror të lëngshëm rus
Qeveritë europiane janë akuzuar për nxitjen e luftës së Vladimir Putin-it në Ukrainë, pasi të dhënat e reja tregojnë se Kremlini fitoi rreth 7.2 miliardë euro vitin e kaluar nga eksportimi i gazit natyror të lëngshëm (LNG) në BE.
Brukseli është zotuar të ndalojë importet e gazit natyror të lëngshëm rus deri në vitin 2027, por një analizë tregon se ende nuk ka ndonjë ulje në sasitë që po merren në portet europiane nga kompleksi rus i gazit natyror të lëngshëm në gadishullin Yamal në Siberi.
Sipas organizatës joqeveritare për të drejtat e njeriut Urgewald, mbi 15 milionë ton LNG nga Yamal u transportuan në terminalet e BE-së gjatë vitit 2025, duke i sjellë Kremlinit rreth 7.2 miliardë euro të ardhura.
Rikthehet energjia për mijëra shtëpi në Berlin pas një sulmi ndaj linjave elektrike që shkaktoi ndërprerje
Operatori i rrjetit elektrik të Berlinit njoftoi se energjia u rikthye gradualisht të mërkurën për të gjitha shtëpitë e mbetura pa shërbim.
Rreth 45,000 familje dhe 2,200 biznese humbën furnizimin me energji të shtunën në mëngjes pas një zjarri në jugperëndim të kryeqytetit gjerman, ku u dogjën shumë prej kabllove të tensionit të lartë.
Autoritetet arritën gradualisht të rilidhnin shumë prej tyre në rrjet, por u deshën disa ditë punë për të riparuar dëmin.
Kjo, ishte ndërprerja më e gjatë e energjisë elektrike në vend që nga fundi i Luftës së Dytë Botërore.
Franca i jep lamtumirën yllit të filmit Brigitte Bardot me funeral dhe homazhe publike në Saint-Tropez
Dashamirës mbushën rrugët e qytetit të lindjes së Brigitte Bardot, Saint-Tropez, të mërkurën për funeralin e ikonës franceze, ndërsa bashkëshorti i saj zbuloi se ajo kishte vdekur nga kanceri.
Arkivoli i saj u prit në shkallët e kishës Notre-Dame de l'Assomption nga djali i saj, me të cilin ishte ndarë prej kohësh, në fillim të një shërbese mortore tradicionale katolike në mëngjes.
Ylli i viteve '50 dhe '60 u varros në varrin e familjes së saj në bregdetin mesdhetar më vonë gjatë ditës, pasi vdiq në moshën 91 vjeçare në shtëpinë e saj më 28 dhjetor.
"Jashtë amerikanët!": Mijëra njerëz protestojnë në Kolumbi ndërsa zemërimi rritet për ndërhyrjen e Trump-it në Venezuelë
Mijëra kolumbianë dolën në protesta kundër kërcënimeve të Donald Trump për veprime ushtarake në Kolumbi pas sulmit amerikan në Venezuelë, duke brohoritur “Jashtë amerikanët!” dhe mbështetur presidentin venezuelian Nicolás Maduro.
Presidenti kolumbian Gustavo Petro mbështeti tubimet, duke dënuar sulmin si të paligjshëm, por shprehu gatishmërinë për dialog me Trump-in.
Protestat u përhapën në të gjithë Amerikën Latine, duke refuzuar ndërhyrjen ushtarake amerikane dhe përpjekjet për kontrollin e burimeve të naftës.
Ekspertët e rajonit kritikuan Trump-in për grabitje të burimeve dhe dështimin në mbrojtjen e marrëdhënieve diplomatike dhe demokracisë.
