Izraeli godet me sulme ajrore kryeqytetin e Jemenit, Sana’a

Forcat ajrore izraelite kanë goditur të enjten kryeqytetin e Jemenit, Sana’a, sipas zyrës mediatike të rebelëve Houthi.

Banorët raportuan shpërthime të fuqishme në pjesët jugore dhe perëndimore të qytetit.

Ushtria izraelite nuk ka komentuar menjëherë për sulmet.

Bombardimet ndodhën ndërsa kanali televiziv satelitor i Houthive, al-Masirah, transmetonte një fjalim të regjistruar të udhëheqësit të tyre, Abdul-Malik al-Houthi.

Franca, Gjermania dhe Britania kërkojnë rikthimin e sanksioneve të OKB-së ndaj Iranit

Franca, Gjermania dhe Mbretëria e Bashkuar nisën të enjten procesin për të rikthyer sanksionet e Kombeve të Bashkuara kundër Iranit, për shkak të programit të tij bërthamor, pas një konflikti 12-ditor me Izraelin në qershor, gjatë të cilit objektet bërthamore iraniane u bombarduan disa herë.

Ky mekanizëm, i njohur si “snapback” nga diplomatët që e negociuan në marrëveshjen bërthamore të vitit 2015 (JCPOA), është krijuar që të mos mund të bllokohet në Këshillin e Sigurimit të OKB-së dhe ka gjasa të hyjë në fuqi.

Rikthimi i sanksioneve përfshin ngrirjen e pasurive iraniane jashtë vendit, ndalimin e marrëveshjeve të armëve me Teheranin dhe penalizimin e çdo zhvillimi në programin e tij të raketave balistike, duke e goditur edhe më fort ekonominë tashmë të brishtë të vendit.

OKB voton për përfundimin e misionit paqeruajtës UNIFIL në Liban deri në fund të vitit 2026

Këshilli i Sigurimit i Kombeve të Bashkuara votoi unanimisht të enjten për të përfunduar mandatin e forcës paqeruajtëse UNIFIL në Libanin jugor, pas gati pesë dekadash veprimtari. Vendimi erdhi pas kërkesës së Shteteve të Bashkuara dhe aleatit të saj të ngushtë, Izraelit.

Fillimisht SHBA kërkonte përfundimin e misionit brenda gjashtë muajsh, por më pas ra dakord për një zgjatje përfundimtare prej një viti. UNIFIL tani do të vazhdojë aktivitetin e saj për një mandat të fundit 16-mujor, deri më 31 dhjetor 2026.

Brenda kësaj periudhe, misioni do të ketë kohë për të tërhequr 10,800 persona, pjesë e personelit ushtarak, civil si dhe të gjithë pajisjet e OKB-së. Gjatë kësaj kohe, UNIFIL do të jetë e autorizuar të kryejë vetëm disa aktivitete të kufizuara.

Zelensky: Rusia zgjedh raketat në vend të diplomacisë

Presidenti i Ukrainës, Volodymyr Zelensky, ka kritikuar ashpër Moskën pas një sulmi ajror masiv që goditi disa qytete ukrainase në orët e para të së enjtes, duke thënë se "Rusia zgjedh raketat balistike në vend të tryezës së bisedimeve."

“Këto raketa dhe dronë sulmues rusë janë përgjigja e qartë për të gjithë ata në botë që prej javësh dhe muajsh kanë kërkuar armëpushim dhe diplomaci të vërtetë,” shkroi ai në një postim në platformën X.

Pavarësisht se sulmet vranë të paktën 18 persona, Kremlini ka deklaruar se vazhdon të jetë i interesuar për “bisedime paqeje”.