Netanyahu në SHBA për bisedime mbi armëpushimin në Gaza
Kryeministri izraelit, Benjamin Netanyahu u nis të dielën drejt Shteteve të Bashkuara për të zhvilluar një takim me presidentin amerikan Donald Trump, me qëllim arritjen e një marrëveshjeje të re për armëpushimin në luftën në Gaza.
Netanyahu deklaroi para gazetarëve se Trump “pa dyshim mund të ndihmojë në avancimin e përpjekjeve për armëpushim”, duke shtuar se Izraeli “nuk ka pasur kurrë një mik të tillë në Shtëpinë e Bardhë”.
Ai theksoi se mbetet i vendosur për të kthyer pengjet e mbetura që mbahen nga Hamasi. Sipas tij, 20 prej tyre janë ende gjallë, ndërsa 30 kanë humbur jetën. Po ashtu, ai nënvizoi synimin kryesor të Izraelit për të shkatërruar fuqinë ushtarake dhe sunduese të Hamasit.
Mediat raportojnë se Trump ka propozuar një marrëveshje fillestare për armëpushim 60-ditor, që përfshin lirimin e pjesshëm të pengjeve dhe shtimin e ndihmës humanitare për Gazën.
Mijëra besimtarë festojnë 90-vjetorin e Dalai Lamës në Dharamshala
Mijëra besimtarë u mblodhën të dielën në qytetin indian të Dharamshalas për të festuar ditëlindjen e 90-të të Dalai Lamës, udhëheqësit shpirtëror të Budizmit Tibetan.
Dalai Lama, i cili jeton në mërgim që prej vitit 1959 kur u largua nga kontrolli kinez, tha se ishte i vetëdijshëm për trashëgiminë e tij në këtë ditë të veçantë.
I veshur me një mantel tradicional dhe një shall të verdhë të gjatë, Dalai Lama u shoqërua në oborrin e tempullit nga një grup murgjish, ndërsa artistë tibetianë rrihnin daulle dhe luanin me gajde.
Përmbytje shkatërruese në Teksas, 82 të vdekur dhe dhjetëra të zhdukur
Autoritetet konfirmuan të dielën se numri i viktimave nga përmbytjet e befasishme në Teksas ka arritur në 82. Përmbytjet kanë shkatërruar zona të tëra dhe kanë marrë me vete shtëpi nga themelet.
Guvernatori i Teksasit, Greg Abbot, deklaroi se të paktën 41 persona rezultojnë të zhdukur, përfshirë dhjetë fëmijë dhe një këshilltar nga një kamp veror i krishterë. Abbot u zotua se kërkimet do të vazhdojnë “derisa të gjithë të gjenden”.
Ai paralajmëroi gjithashtu për reshje të mëtejshme që pritet të zgjasin deri të martën, duke shtuar rrezikun për kushte edhe më të rrezikshme në zonat e prekura.
Pavarësisht thirrjeve të autoriteteve për të mos ndërhyrë, vullnetarë dhe familjarë të të zhdukurve udhëtuan drejt zonave më të prekura për të kërkuar përgjatë brigjeve të lumenjve.
Polonia rivendos kontrollet kufitare me Gjermaninë dhe Lituaninë
Polonia do të rivendosë kontrollet kufitare me Gjermaninë dhe Lituaninë duke filluar nga e hëna, si përgjigje ndaj kritikave në rritje ndaj vendimit të Berlinit për të kthyer mijëra migrantë që sipas autoriteteve gjermane kishin kaluar ilegalisht në territorin e saj nga Polonia.
Qendra për Sigurinë e Qeverisë Polake (RCB) njoftoi se “kontrollet në kufi me Gjermaninë dhe Lituaninë do të fillojnë më 7 korrik”.
Kryeministri Donald Tusk e bëri publike këtë vendim të martën e kaluar gjatë një mbledhjeje të qeverisë.
“Vendosëm që të rikthejmë përkohësisht kontrollin në kufirin polako-gjerman dhe në atë polako-lituanez,” tha Tusk.
