Trump paralajmëron: Putin mund të tentojë të pushtojë edhe vende të tjera
Presidenti amerikan Donald Trump deklaroi se homologu i tij rus, Vladimir Putin, mund të synojë të pushtojë edhe vende të tjera pasi të ketë arritur objektivin e tij ndaj Ukrainës. Deklarata u bë gjatë një konference për shtyp në samitin e NATO-s në Hagë, të mërkurën.
I pyetur nëse e konsideron Putinin si armik dhe nëse beson se ai ka ambicie territoriale përtej Ukrainës, Trump u përgjigj:
“Është e mundur.
E konsideroj si një person të çorientuar”, tha presidenti amerikan.
Trump shtoi se Putin e kishte kontaktuar për të ofruar ndihmë në zgjidhjen e konfliktit të fundit në Lindjen e Mesme, duke propozuar të ndërmjetësonte mes SHBA-së, Izraelit dhe Iranit.
Samiti i BE-së: Udhëheqësit takohen për të diskutuar situatën në Ukrainë dhe Gaza
27 liderët e Bashkimit Europian janë mbledhur në Bruksel për një samit njëditor me një agjendë të ngarkuar gjeopolitike. Çështjet kryesore përfshijnë konfliktin mes Izraelit dhe Iranit, katastrofën humanitare në Rripin e Gazës, agresionin rus ndaj Ukrainës dhe marrëdhënien e brendshme të aleancës transatlantike pas deklaratave të Donald Trump.
Një raport i gjerë prej shtatë faqesh, i hartuar mbi bazën e punës së organizatave ndërkombëtare, rendit shkelje të shumta të ligjit ndërkombëtar humanitar: bllokimin e ndihmës humanitare, sulmet ushtarake ndaj spitaleve, zhvendosjen e detyruar të popullsisë palestineze, arrestimet masive, ndalimet arbitrare dhe dhunën nga izraelitët.
Megjithatë, shtetet anëtare mbeten të ndara për mënyrën se si duhet të veprojnë. Disa kërkojnë një përgjigje konkrete, ndërsa të tjerë preferojnë të mos marrin masa
Kreu i CIA-s thotë se uzinat bërthamore të Iranit janë dëmtuar rëndë
Kreu i CIA-s deklaroi se sulmet amerikane kanë “dëmtuar rëndë” kapacitetet bërthamore të Iranit, duke i kthyer prapa për vite me radhë. Kjo deklaratë bie ndesh me një raport të klasifikuar që është publikuar më herët, i cili minimizonte ndikimin e sulmeve, gjë e cila kishte sjellë edhe zemërimin e presidentit Trump.
Drejtori i inteligjencës amerikane, John Ratcliffe, tha se vendndodhje kyçe janë shkatërruar, por nuk deklaroi se programi bërthamor i Iranit ishte eliminuar plotësisht.
Më herët, Trump këmbënguli se sulmi kishte “shkatërruar” plotësisht objektet bërthamore të Iranit.
Papa Leoni XIV bën thirrje për paqe në Lindjen e Mesme
Papa Leoni XIV deklaroi se rajoni i Lindjes së Mesme ka nevojë të domosdoshme për paqe. Ai kujtoi sulmin terrorist në kishën Mar Elias në Damask, Siri, tre ditë më parë, teksa u lut për të plagosurit dhe familjet e tyre.
Duke iu drejtuar të krishterëve në Lindjen e Mesme, Papa shprehu solidaritetin e tij:
“Jam pranë jush dhe e gjithë Kisha është me ju. Ky sulm i fundit nxjerr në pah brishtësinë e thellë që Siria vazhdon të përjetojë pas viteve të paqëndrueshmërisë dhe dhunës”, tha ai.
Papa u bëri thirrje vendeve të botës që të mos i largojnë sytë nga Siria. “Përkundrazi”, tha ai, “bashkësia ndërkombëtare duhet të ofrojë mbështetje përmes veprave konkrete të solidaritetit dhe përkushtimit të ripërtërirë për paqe dhe pajtim”.
“Një komb nuk duhet të ngrejë shpatën kundër një kombi tjetër," përfundoi Papa.
