Filmat dhe serialet na kanë mësuar se dashuria duhet të shoqërohet me gjeste madhështore: një fushë e mbushur me lule, një serenatë në mes të turmës, një fluturim i papritur për të kaluar fundjavën bashkë. Por realiteti është pak më ndryshe. Në jetën e përditshme, këto skena romantike nuk janë gjithmonë të mundshme dhe ndoshta as të domosdoshme.

Kështu lind koncepti i ri: micromance.

Micromance lidhet me gjestet e vogla, por domethënëse, që forcojnë lidhjen mes partnerëve. Nuk ka të bëjë me darka të shtrenjta apo surpriza të bujshme, por me kujtimet e vogla, praninë emocionale dhe vazhdimësinë e përkushtimit.

Ky fenomen përfshin veprime të vogla që tregojnë dashuri çdo ditë: një mesazh i ëmbël gjatë një dite të ngarkuar, një kafe nga vendi i preferuar i partnerit, një shënim i lënë në frigorifer. Pikërisht këto detaje ndërtojnë intimitet, besim dhe një lidhje të fortë emocionale.

Ndonjëherë, gjestet e mëdha mund të duken boshe, veçanërisht në fillimet e një njohjeje. Një darkë luksoze apo një dhuratë e shtrenjtë mund të jetë mbresëlënëse, por edhe e tepruar dhe jo gjithmonë e sinqertë. Prandaj janë veprimet e vogla që tregojnë realisht sa të rëndësishëm jemi për njëri-tjetrin.

Për shembull, imagjino një çift ku partnerja përmend rastësisht se dëshiron të provojë pickleball (një sport i ngjashëm me tenisin). Fundjavën tjetër, partneri i saj e surprizon me një set pickleball dhe i propozon t’ia mësojë. Apo një i dashur që vjen me picën e preferuar kur partnerja nuk ndihet mirë. Pikërisht këto janë momentet që bëjnë diferencën.

Përfitimet e “micromance”

Sipas ekspertëve të marrëdhënieve, ky lloj përkushtimi është një mënyrë e shkëlqyer për të treguar që dashuria është e vërtetë dhe e vazhdueshme. Kur merr kohë për të bërë diçka të vogël për partnerin, në fakt po i komunikon që ai është i rëndësishëm për ty.

Një tjetër përparësi? Këto gjeste janë shpesh më domethënëse sesa dhuratat e shtrenjta. Dashuria nuk matet me çmim, por me detajet e vogla që tregojnë kujdes dhe vëmendje. Dhe në fund të fundit, nuk janë skenat dramatike që mbajnë një marrëdhënie, por ato momentet e vogla që ndihen të mëdha.

Burime: HuffPost