Nëse jeni ende në dilemë se si ta dekoroni pemën tuaj të Vitit të Ri, mos u shqetësoni! Kemi mbledhur sugjerimet më kreative (dhe paksa të çuditshme) nga ndjekësit tanë. Zgjidhni sipas humorit dhe… buxhetit!
1. Pema me fjongo rozë (shumë “coquette”)
Për ata që duan të sjellin atmosferën e një shtëpie kukullash në dhomën e ndenjes kemi një sugjerim: Fjongo rozë kudo!
“Po ne s’na pëlqen roza,” - do thoni ju. Ndërsa ne do ju themi që mund të bëni të njëjtën gjë, por me të kuqen!
2. Fjongo të kuqe
Një pemë që duket sikur ka ardhur nga rezidenca e Babagjyshit. Me globa të kuq, fjongo të kuqe dhe nëse ju teprojnë energjitë, mund të shtoni edhe një çorape të kuqe si detaj shtesë.
3. E gjitha gri dhe shkëlqyese!
Pema gri që shkëlqen duket sikur sapo është sjellë nga një skenë e filmit Frozen"! Mund të jetë minimaliste, por kujdes se mos e ngatërron dikush me frigoriferin.
4. Pema me zambakë të bardhë (për të rafinuarit)
Ndjekësit tanë me shije aristokratësh sugjerojnë zambakë të bardhë dhe ndoshta nuk e kanë gabim. Shikoni sa bukur duket.
5. Shumëngjyrëshe
Kjo është zgjidhja ideale për ata që duan një shpërthim ngjyrash në shtëpi. Me një paletë kaq të gjerë, mund të përshtatet me çdo mjedis… ose t’i japë dhimbje syve të komshiut.
6. Ekonomike dhe praktike
Nëse mendoni që zbukurimet janë një rrezik për tapetin tuaj (ose për macen që ju kthen dhomën përmbys), ndjekësit tanë kanë një zgjidhje të thjeshtë: një pemë të vogël! E thjeshtë, pa shumë harxhime dhe me më pak stres.
Nëse asnjë nga këto ide nuk ju frymëzon, kujtoni se më e rëndësishmja është atmosfera festive. Edhe një pemë bosh mund të shkëlqejë, mjafton të vendosni disa drita dhe pak humor të mirë (që mund ta gjeni në faqen e Anabel). Gëzuar!
