Kushdo që ka kaluar në fshatin e Vunoit, me siguri ka fërkuar sytë dhe ka parë i mrekulluar pamjen karakteristike të zonës, ndërtesat kryesisht prej guri që duken sikur qëndrojnë stoike përballë detit të pamatë. Atje ku dikur shihje shtëpi të vjetra të rrënuara, sot sheh ndërtesa moderne që nuk e kanë humbur aspak identitetin, përkundrazi rrethohen nga tradita në çdo element.
Pamjet mbresëlënëse që do të shihni në vijim mbajnë vulën e arkitektes Persida Shkrepa, themeluesja e APPA Architects, e cila përveç butikëve më të spikatur në kryeqytet, njihet për projektet e vilave unike të Vunoit dhe ato në Gjirin e Lalëzit (për këto të fundit do të flasim pak më tej).
Shihni këtë vilë në Vuno që dallon mes të tjerave nga grilat në ngjyrë të bruztë. “Që në hapat e para të projektimit, është vendosur të ruhet tipologjia e vilave dhe e ndërtimit në fshat: ndërtim me mure guri, dritaret drejtkëndore dhe në pjesën e hollit me hark si edhe grila druri veneciale. Stili i projektimit është rustic dhe mesdhetar,” tha Shkrepa për Anabel.
Pamja panoramike ruhet në çdo cept të objektit prandaj edhe Shkrepa ka luajtur me elementin e xhamit. Karakteristikë dhe veçanti e vilës është pozicionimi i saj në krye të një shkallare taracash të cilat kanë funksione si tarracë e gjelbëruar, parkim, kantinë vere në hapësirën e brendshme etj.
Elementët e stilit mesdhetar ruhen edhe në ambientet e brendshme. “Vila duhet të ishte patjetër në harmoni me filozofinë e identitetin e ndërtimit të Vunoit, por duhej të vinte më e freskët dhe të dallonte se ishte ndërtuar dhe projektuar në shekullim 21. Një vilë për t’u dashuruar me shikim të parë dhe jetesë komode sipas konceptit modern,” ka thënë Shkrepa në një intervistë për Bordo.
Adhuruese e arkitekturës landscape, duket se themelueses së APPA Architects i pëlqejnë sfidat e guximshme dhe jo më kot ka arritur të sjellë një tjetër tipologji ndërtimi në Vuno, që është ndryshe nga ndërtimet e tjera, por njëkohësisht shkrihet bukur me gjithë pamjen.
Fjalët janë të tepërta kur pamja flet vetë për këtë vilë minimaliste. Tarraca me guralecë është një ide brilante.
Më lini të jetoj këtu dhe do të jem më e lumtura në botë:
Nuk i harruam vilat në Gjirin e Lalëzit! Deti, natyra dhe njeriu shkrihen përmes elementëve minimalistë për një hapësirë sa funksionale aq edhe çlodhëse dhe të veçantë.
Betoni është një material që mund të perceptohet si i ftohtë në ndjesinë që mund të përcjellë në arredimin e jashtëm dhe të brendshëm, por këto pamje tregojnë të kundërtën. Ja sa bukur duken elementët e gërshetuar me terrenin rrethues!
Suksesi në projektimin e disa nga vilave më të veçanta në bregdetin shqiptar nuk do të mbarojë këtu për një ekip vizionar si APPA Architects, punimet e të cilëve janë një vlerë arkitekturore për zonat ku ndodhen.
View this post on Instagram
