Në një video të podkastit "Really Famous with Kara Mayer Robinson", Chris Noth tregoi se shkaku pse ai dhe Sarah Jessica Parker nuk janë më miq është prej deklaratës publike të saj dhe të tjera aktoreve të kastit "Sex and the City" ndaj akuzave për sulm seksual me të cilat aktori po përballej në vitin 2021.
Edhe pse intervista e plotë shfaqet më 26 janar, gjatë një klipi të shkurtër aktori shprehu zhgënjimin dhe habinë që pasoi deklaratën e tyre.
"Deklarata që ato nxorën, që në thelb nuk ishte gjë tjetër veçse ruajtje e imazhit, nuk e di, ishte e trishtueshme, zhgënjyese dhe befasuese.”
Chris Noth u shpreh se e kuptonte, fundja kjo është bota e Hollywood-it, por sërish, për hir të viteve nuk e justifikon veprimin e saj.
"Para se të bësh një deklaratë të tillë, më njeh, më ke njohur gjithë këto vite, më telefono që të të tregoj të vërtetën për këtë çështje. Kjo nuk ndodhi dhe ishte për të ardhur keq.”
Më tej ai u shpreh se këto situata të ndihmojnë të kuptosh se kush janë miqtë e vërtetë, por sërish tha se nëse ai do të kishte qenë në vendin e saj, nuk do të kishte vepruar njësoj. E gjithë situata e krijuar u konsiderua prej tij e dhimbshme dhe ndikoi shumë në marrëdhënien mes tyre.
Aktori u përball me akuza për sulm seksual në vitin 2021. Ai mohoi secilën prej tyre, por pranoi se e kishte tradhtuar bashkëshorten, Tara Wilson.
Fill pas akuzave, aktoret kryesore të serialit "Sex and the City" përmes një deklarate publike dolën në mbështetje të tyre.
Që prej këtij momenti është përfolur jo pak për një krisje të marrëdhënieve mes aktorit dhe pjesës tjetër të kastit.
