Të gjithë fansat i kanë sytë te personazhi i Anne Hathaway në filmin "The Devil Wears Prada 2". Shpesh fotot e saj gjatë xhirimeve janë bërë virale, ndaj le të themi se “e kanë marrë mësysh”.
Aktorja 42-vjeçare pati një incident gjatë xhirimeve, pasi rrëshqiti dhe ra nga shkallët.
Fotot nga seti tregojnë fituesen e çmimit Oscar të veshur me një fund të zi deri në gju me pala, një bluzë transparente me motive katrore mbi një kanotiere të zezë dhe sandale të zeza të larta me rripa dhe detaje argjendi.
Pavarësisht rrëzimit, Hathaway u ngrit shpejt, duke buzëqeshur "Jam mirë!" u tha ajo të pranishmëve. Më pas përqafoi disa anëtarë të stafit dhe vazhdoi me xhirimet. Ende nuk dihet nëse rrëzimi ishte pjesë e skenarit apo ndodhi rastësisht.
Filmi origjinal nga viti 2006 është bazuar në romanin me të njëjtin titull të Lauren Weisberger, ish-asistente e redaktores së famshme të Vogue, Anna Wintour, e cila kohët e fundit u tërhoq nga posti pas 37 vitesh në krye të revistës.
Në vazhdimin e filmit, Hathaway rikthen rolin e Andy Sachs, e diplomuara e re që hyn në botën intensive të modës dhe medias. Ajo përpiqet të balancojë të kaluarën e saj modeste me një të ardhme premtuese, ndërkohë që punon si asistente e redaktores së fuqishme Miranda Priestly (luajtur nga Meryl Streep), me mbështetjen e mikut të saj dhe drejtorit artistik të revistës Runway, Nigel (Stanley Tucci).
