Hugh Jackman dhe Deborra-Lee Jackman i dhanë fund martesës së tyre pas 27 viteve, duke çuditur njerëzit. Ata patën një prej martesave më të gjata në Hollywood, ndaj kur lajmi u bë i ditur, i kapi njerëzit në befasi. Megjithatë, Hugh ka reaguar për të parën herë, me një fjali të shkurtër, duke treguar se po kalon një moment të vështirë.
Në videon e publikuar nga TMZ, aktori thotë: “Është një periudhë e vështirë. I vlerësoj mendimet tuaja, faleminderit”.
Ish-çifti u divorcua pas pothuajse 3 dekadave bashkë dhe në një deklaratë ekskluzive për People, u shprehën: “Kemi qenë të bekuar që ndamë pothuajse 3 dekada bashkë si burrë e grua në një martesë të mrekullueshme dhe të dashur. Rrugëtimi ynë po ndryshon dhe ne kemi vendosur që të ndahemi për të vijuar rritjen individuale. Familja jonë ka qenë dhe do të mbetet gjithnjë prioriteti kryesor. Ne po ndërmarrim këtë kapitull të ri me mirënjohje, dashuri dhe mirësi”, duke shtruar edhe kërkesën për privatësi në këtë moment tranzicioni për familjen e tyre.
Hugh dhe Deb u takuan në vitin 1995 dhe u martuan një vit më vonë. Arsyeja e ndarjes së tyre është ende e paqartë, por në prill të këtij viti, gjërat dukeshin mjaft mirë, ndërsa Hugh uroi (ish) bashkëshorten për përvjetorin e tyre.
View this post on Instagram
“Të dua, Deb. Sot është përvjetori ynë i 27. 27 vite! Të dua shumë. Së bashku kemi krijuar një familje të bukur. Dhe një jetë. E qeshura, shpirti, bujaria, humori, kurajoja dhe besnikëria jote janë një dhuratë e mrekullueshme për mua. Të dua me gjithë zemër”, shkroi ai në mbishkrim. Gjithsesi, kjo ka ndodhur para disa muajsh dhe të gjithë e dimë se gjërat në një marrëdhënie mund të ndryshojnë shpejt.
