Pengesat shkojnë e vijnë, por Bricjapët nuk dorëzohen! Ky është qëndrimi juaj gjatë gjithë vitit 2023! Të fortë, të patundur dhe në kërkim të përparimit.

Do të keni sukses në shumë sfera të jetës, të cilat do t’i menaxhoni në mënyrë korrekte dhe vigjilente. Financat do të jenë të shkëlqyera, ama edhe me disa problematika të vogla. Meqë ra fjala te problemet, disa të tilla do të hasni edhe me shëndetin.

Ca ngjarje do të vonohen pak, por këto do t’ju shpëtojnë nga sfida të shumta. Që në tremujorin e parë të vitit, do të keni një qasje më pozitive në dashuri, karrierë e kudo. Mos bëni rrugë të shkurtra për të arritur drejt suksesit, por prisni dhe shkëlqeni, siç bëni përherë.
 
Besoni në idetë tuaja, por mos fluturoni shumë lart, pasi mund të përballeni me telashe, pengesa në punë e në karrierë. Mund të vuani nga disa probleme shendetësore, por mos u shqetësoni, pasi të gjitha do t’i rregulloni shumë shpejt. Madje, gjatë kësaj kohe do të sheshoni gjërat edhe me njerëzit e dashur, të cilët ndonjëherë mund t’i keni lënduar.

Dashuria

Surpriza, ulje-ngritje dhe shumë më tepër! Këto parashikon ky vit, ndaj mos u çudisni nëse haseni me sfida me personin e zemrës. Nëse sapo keni krijuar një marrëdhënie, do ta kuptoni nëse është personi i duhur për ju, përmes komunikimit.

Ndërsa çiftet që kanë kohë bashkë do të marrin disa vendime të rëndësishme në romancën e tyre. Do të kuptoni se si ndiheni e më pas, do ta dini nëse ia vlen të qëndroni ose jo. Do të keni dilema të shumta, por me komunikim mund t’i zgjidhni problemet.
 
Për beqarët do të ketë partnerë të denjë, të cilët do t’i takoni rastësisht përmes miqve të përbashkët. Në gjysmën e dytë të vitit, dashuria do të lulëzojë dhe do të përjetoni emocione të forta.
 
Ah, nëse prisni që ish-i të kthehet, bëni dhe ju lëvizjet tuaja. Ndiqni zemrën, lërini pas hatërmbetjet dhe flisni me personin me të cilin doni të ktheheni. Me komunikimin e duhur, do të rregulloni gjithçka.

Karriera

Si Bricjapë që jeni, ju orientoheni drejt karrierës dhe planifikoni të ardhmen tuaj. Kjo do t’ju ndihmojë të vlerësoheni edhe më shumë, sidomos nëse bëni pjesë në profile krijuese. Puna dhe përvoja juaj do të përmirësohet dhe do të mund t’i shihni gjërat më qartë. Disa probleme mund të shfaqen rrugës, por puna juaj e palodhur do të japë rezultate të kënaqshme.
 
Merrni disa këshilla nga ata që janë më të vjetër, në moshë dhe në profesion. Pjesa e dytë e vitit do t’ju ndihmojë t’u tregoni të tjerëve se sa të aftë jeni dhe këtë do ta bëni më së miri, ama, do të ketë edhe kolegë që do të flasin pas shpine për ju. Mos humbni energji me ta, por shihni punën dhe planet tuaja.
 
Sigurohuni që të keni një qëllim të qartë dhe më pas, mund ta prezantoni synimin tuaj me të tjerët. Partneritetet do të lulëzojnë dhe do t’ju ndihmojnë të realizoni këtë qëllim.

Një periudhë konfuzioni mund t’ju detyrojë që të dyshoni në aftësitë tuaja, ndaj mundohuni të shmangni situata dhe njerëz që jua shtojnë këto mendime. Mblidhni veten dhe sigurohuni që t’i jepni vlerën e duhur kohës dhe përpjekjeve tuaja. Nëse keni ngecur diku, është momenti të kërkoni këshilla nga njerëzit tek të cilët keni besim.

Financat

Do të keni rezultate të frytshme në blerjen e pronave të paluajtshme. Nëse keni në plan të shisni një pronë të vjetër, gjysma e parë e vitit është koha e duhur, pasi do të keni shumë fitimprurje. Bëni kujdes nga veprimet e pamenduara, pasi do t’ju sjellin goxha telashe.

Mundohuni të investoni në 3-mujorin e parë të vitit. Disa prej jush do t’i japin fund një çështjeje ligjore e disa të tjerë mund të përballen me vonesa që lidhen me paratë.

Ka gjasa që disa familjarë t’ju ndihmojnë me të ardhurat dhe sapo të rimerrni veten, do të shpenzoni shumë për dhurata për veten dhe të tjerët. Thjesht, jini të vetëdijshëm që jo gjithçka funksionon siç doni ju, ndaj nëse keni hapësirë për kursim, kurseni!

Artikuj të sugjeruar: