Ministri gjerman i Financave, Olaf Scholz, do të betohet si kancelar muajin e ardhshëm, moment që do të shënojë zyrtarisht fundin e epokës 16-vjecare të Angela Merkel në krye të shtetit gjerman.
Ai udhëhoqi Partinë Social Demokratike (SPD) në një fitore të ngushtë në zgjedhjet parlamentare të shtatorit. Sipas marrëveshjes së shpallur në Berlin të mërkurën, partia e qendrës së majtë të Scholz do të kryesojë një koalicion trepartiak me partnerë të Partisë së Gjelbër dhe Demokratët e Lirë, pas dy muajsh negociata për të formuar një qeveri të re.
Stili i tij politik nuk është i ndryshëm nga ai i Merkelit - të dy janë të ngjashëm në shumë mënyra, pavarësisht se vijnë nga partitë rivale.
"Ai shfaqet si i qetë, i matur, i qëndrueshëm," tha Corinna Hoerst, një bashkëpunëtore e lartë në Fondin Marshall Gjerman të Shteteve të Bashkuara (GMF) në Bruksel.
Scholz të premten u tha gazetarëve "qeveria e tij semafor" është këtu, duke iu referuar ngjyrave të kuqe, të verdhë dhe jeshile të partive përkatëse. "Ne duam të jemi të guximshëm kur bëhet fjalë për klimën dhe industrinë," tha ai.
63-vjeçari, një anëtar i përjetshëm i SPD-së, ka lindur aty ku dikur ishte Gjermania Perëndimore, një detaj që e veçon nga Merkel, e cila u rrit në Gjermaninë Lindore.
Scholz shërbeu si ministër i Punës dhe Çështjeve Sociale në qeverinë e parë të koalicionit të Merkelit në fund të viteve 2000. Në vitin 2011, u zgjodh kryebashkiak i Hamburgut, një post që e mbajti deri në vitin 2018. Që atëherë, ai ka shërbyer si zëvendëskancelar dhe ministër i financave në qeverinë e koalicionit të Merkelit, një pozicion i fuqishëm në politikën kombëtare gjermane.
Profili i tij u rrit edhe më tej kur mbikëqyri programet e kompensimit të koronavirusit për bizneset, punonjësit dhe ata që humbën të ardhurat sepse duhej të karantinoheshin gjatë pandemisë.
Në shtator ai tha se teksa botë "bëhet më e rrezikshme", vendet demokratike duhet të bashkëpunojnë. “Është e rëndësishme që të punojmë së bashku, edhe nëse kemi konflikt në njërën apo tjetrën çështje.”
