Më 31 dhjetor, Australia dhe Shqipëria u tronditën nga historia e çiftit shqiptar, Lindita dhe Veton Musai të vrarë në shtëpinë e tyre nga vetë babai i Linditës, i cili më pas qëlloi dhe veten.
Të rinjtë shqiptarë me banim në Yarraville, Melbourne, Australi, sapo kishin festuar 1-vjetorin e martesës kur u qëlluan për vdekje rreth orës 10:30 të mëngjesit të së martës (31 dhjetor).
Fillimisht, u aludua se krimi i trefishtë nga 55 vjeçari Osman Shaptafaj, erdhi si pasojë e konflikteve në familje. Së fundmi, gjatë programit "Shqipëria Live" në Top Channel, miku i Osman Shaptafaj, tregon dëshira për t'u hakmarrë ndaj gruas së tij e ka çuar drejt krimit makabër; në vrasjen e vajzës 25-vjeçare dhe dhëndrit të tij, 29-vjeç.
"Kam 25-vjet që e njoh autorin e krimit. Na ka tronditur kjo ngjarje. Lindita kishte 15-vjet që nuk jetonte me babain sepse prindërit iu divorcuan. Osmani kishte 7 vite i izoluar, kisha kohë që nuk dëgjoja për të. Edhe kur takova vajzën e ndjerë, Linditën para disa kohësh dhe e pyeta se ç'bëhej me të atin, duke u dridhur më tha se as ato nuk kishin dëgjuar gjë."- u shpreh Naim Flamuri, mik i familjes.
I pyetur nëse shkak i këtij krimi ka qenë divorci apo hakmarrja ndaj ish-gruas, Flamuri pohon se kohët e fundit, babai vrasës e kërcënonte duke i thënë se do lëndonte "ku i dhimbte më shumë".
"Kohët e fundit kërcënonte, por askush s'e mendoi se do të arrinte deri këtu. S'e mendonim se do të vriste vajzën. Kjo gjë është e paarsyetueshme."- vijon ai, duke treguar se Osman Shaptafaj kishte ndryshuar totalisht që pasi i vranë motrën e madhe. Ai thotë se që prej asaj dite, 55-vjeçari jetonte në errësirë të plotë dhe vetëm për hakmarrje.
