Në librat komikë, Bruce Wayne drejton biznesin e tij, ndërsa Peter Parker punon si fotograf për Daily Bugle. Por të dy i bashkon dëshira për të luftuar padrejtësinë, Wayne si Batman, ndërsa Peter Parker si Spiderman. Reporteri Clark Kent ishte Superman. Personazhi i famshëm i Alexandre Dumas te “Konti i Monte Kristos”, Edmond Dantès, ishte konti i Monte Kristos, abati italian Giacomo Busoni dhe Lord Wilmore. Në Disney, Miley Stewart ishte edhe Hannah Montana.
Në jetën reale, te artistët përmendim David Bowie, alter egoja më e famshme e të cilit ishte Ziggy Stardust, një alien me tipare njeriu që i mundësonte Bowie-t të ishte i patrembur. Vite më parë, Beyonce krijoi alter egon Sasha Fierce. Ajo e përshkruan atë si më gazmore, sensuale dhe agresive dhe e lejon “ta pushtojë” kur është në skenë.
Shtojmë edhe se Kobe Bryant kishte gjithashtu një alter ego, The Mamba.
Po, çfarë është konkretisht një alter ego?
Alter ego vjen si term nga Ciceroni dhe do të thotë “uni tjetër” ose “miku i besuar”. Sipas ekspertit të alter egos, Todd Herman, autor i “The Alter Ego Effect”, ne të gjithë kemi një version të preferuar të vetes, ashtu siç kemi një vakt ose një ëmbëlsirë të preferuar. Këto versione nuk konkurrojnë njëri-tjetrin, por dalin në kohë të caktuar.
Me fjalë të tjera, një alter ego është një identitet tjetër i krijuar nga një individ për të nxjerrë një version më të mirë ose një version ndryshe të vetes. Jo pak artistë thonë se “kur dalin në skenë shndërrohen”. Sportistët thonë se “në fushë nuk e njohin më veten”.
Sipas Todd Herman, alter egoja nuk është diçka që i përket vetëm njerëzve të famshëm. A është e zbatueshme te një shitës, marangoz, doktor, infermier apo mësues? “Po, absolutisht,” thotë ai. “Gjëja e vetme që duhet të kuptoni për alter egon është se ndërtohet për t’u zbatuar në një kontekst specifik dhe nuk është gjithëpërfshirëse dhe e përjetshme.”
Alteregoja nuk është një tjetër person – jeni ju. Herman thekson se nuk lidhet me të qenurit një person i shtirur, por me të përdorurit të gjitha aftësitë dhe karakteristikat që i keni, por thjesht “janë në gjumë”. Në thelb, nuk ka asgjë të keqe, madje inkurajohet që të veproni dhe silleni ndryshe kur jeni me miqtë, ndryshe në një takim me shefin dhe ndryshe kur drekoni me vjehërrit.
Burimet: Medium, Merriam Webster, Healthline, WebMD, Daring to Live Fully
