Kur bëhet fjalë për ngjarje qiellore që i japin jetës një kthesë dramatike, eklipsi hënor është ai që nuk zhgënjen kurrë. Ndryshe nga prapavija e Mërkurit, e cila shpesh sjell konfuzion pa një përfundim të qartë, një eklips hënor të tregon drejt e në sy se ku po ndodh ndryshimi edhe nëse e kupton vetëm pasi të ketë kaluar.

Në përgjithësi, Hënat e plota janë momente për të lënë pas atë që nuk të shërben më, për të përmbyllur një fazë apo për të çuar një marrëdhënie në një nivel tjetër. Por një eklips hënor është shumë më i fortë aq i ngarkuar me energji saqë e vetmja gjë që mund të bësh është të rrish në shinat e tij dhe të përqafosh ndryshimet që sjell.

Çfarë është një eklips hënor?

Nga ana astronomike, një eklips hënor ndodh kur Hëna është në fazën e saj të plotë dhe Toka pozicionohet mes Diellit dhe Hënës, duke krijuar një hije që errëson dritën e saj dhe shpesh e shndërron në një nuancë spektakolare të kuqe. Ekzistojnë tre lloje eklipsesh hënore:

Eklips i plotë hënor – ndodh kur Hëna kalon plotësisht në hijen e brendshme të Tokës (umbra). Sa më shumë pluhur apo re të ketë në atmosferën e Tokës, aq më e kuqe do të duket Hëna.

Eklips i pjesshëm hënor – ndodh kur Dielli, Toka dhe Hëna nuk janë tërësisht në vijë të drejtë dhe Hëna hyn vetëm pjesërisht në hijen e Tokës.

Eklipsi penumbral – më i buti nga të tre, ku Hëna kalon në hijen e jashtme të Tokës dhe errësohet shumë lehtë.

Çfarë kuptimi ka një eklips hënor në astrologji?

Nëse zakonisht gjatë Hënave të plota vendos kristalet për t’i karikuar, bën ujë hënor apo meditim, eklipset janë një histori tjetër. Ndodhin vetëm dy herë në vit (në raste të rralla, tre herë), dhe energjia e tyre është shumë më intensive. Këto momente astrologjike sjellin kthesa të papritura, mbyllje ciklesh dhe zbulime që nuk mund t’i shmangësh.

Kur ndodhin eklipset hënore në 2025?

Në vitin 2025 do të ndodhin dy eklipse hënore:

E shtunë, 15 mars, ora 08:54 – Hënë e plotë me eklips të plotë hënor në Virgjëreshë

E diel, 7 shtator, ora 20:09 – Hënë e plotë me eklips të plotë hënor në Peshk

Eklipsi i parë, në Virgjëreshë, do të sjellë momente reflektimi mbi mënyrën sesi ndërvepron me të tjerët, si po i menaxhon marrëdhëniet më të ngushta dhe sa ekuilibër ke në jetën tënde. Ky do të jetë një moment për të vlerësuar nëse lidhjet që ke ndërtuar po ushqejnë apo po kufizojnë veten tënde të vërtetë.

Eklipsi i dytë, në Peshk, do të ketë një energji të ndryshme. Duke qenë se Peshku është shenja e fundit e zodiakut dhe sundohet nga Afërdita dhe Neptuni - planetet e dashurisë dhe ëndrrave - ky eklips do të ndriçojë anën tënde shpirtërore. Do të të ndihmojë të kuptosh më qartë çfarë të duhet emocionalisht dhe shpirtërisht në një marrëdhënie. Ky do të jetë një moment ku intuita do të jetë më e rëndësishme se logjika, ndaj dëgjoje atë me kujdes.

Cilat shenja do të ndikohen më shumë nga eklipset e 2025-ës?

Duke qenë se të dy eklipset ndodhin në shenja të ndryshueshme, ndikimi do të ndihet më së shumti nga njerëzit me planetë në shenjën e Binjakëve, Virgjëreshës, Shigjetarit dhe Peshkut. Por, pavarësisht shenjës tënde, do ta ndjesh në një mënyrë ose në një tjetër - sepse eklipset nuk pyesin, vetëm ndodhin.

Burime: Popsugar