Kastro Zizo, gjithmonë është njohur për natyrën e tij të hapur dhe deklaratat shpesh herë të ashpra që nuk kursehet t’i shprehë në çdo lloj forme. Gjë, që jo pak herë e ka bërë atë të jetë pjesë e debateve të ndryshme televizive. Por përpos kësaj, mbetet i veçantë në llojin e tij dhe duket se nuk sheh asnjë arsye për të hequr dorë nga mënyra si e koncepton ai botën.
I ftuar në “Xing me Ermalin”, Kastro realist si kurdoherë ka folur për jetën e tij në përgjithësi. Ndër të tjera ai tregoi se të qënit pikërisht kështu siç është shpesh e ka penalizuar. Baba i 2 fëmijëve, këngëtari tregon se si i tillë është tepër konservator. “Qëllimi i jetës sime, është vajza dhe djali im. Falenderoj zotin për këtë,” pohon ai.
Teksa Ermali e ngacmon duke i thënë se tanimë që mbi shpatulla ka 2 martesa të përfunduara në ndarje, ka hequr dorë nga e gjithë kjo, Kastro nuk nguroi ta kundërshtojë menjëherë. “Sigurisht që do martohem prap, unë nuk jam shumë krenar për martesat e mia, por kështu më shkoi jeta. Ato të dyja janë nënat më të mrekullueshme në botë.” vazhdoi ai.
Nga martesa e parë Kastro ka një djalë 11 vjeçar Dankanin, e ndërsa me ish-bashkëshorten e 2-të, një vajzë 5 vjeçare për të cilët shprehet se nuk e koncepton dot se si mund të ishte jeta pa to.
