Ardhja surprizë e Dua Lipës në Shqipëri e ka një arsye. Ylli i popit zbuloi në Instagram se gjendet në Tiranë për të parë nga afër procesin e ndërtimit të një kopshti për fëmijë.

“E nderuar të jem në Tiranë, Shqipëri sot për të parë punën me ndërtimin e ‘Sunny Hill Kindergarden’ në qendër të qytetit. Pas tërmetit në 2019-n dhe me gjithë ndihmën tuaj për të blerë bluzat tona ‘Lutuni për Shqipërinë’ që krijova me miqtë e mi @bondnyc, unë dyfishova fondet që bëmë me bluzat, të cilat do të shkojnë për ndërtimin e këtij kopshti për 300 fëmijë. Jam mirënjohëse që jam këtu për kopshtin së bashku me familjen dhe miqtë e mi. Faleminderit kryeministrit Rama dhe kryetarit të Bashkisë Erion Veliaj për të gjithë ndihmën tuaj gjatë këtij procesi. Do të hapet më 15 shtator 2021. Faleminderit.”

Siç e do tradita, Dua u takua me kryebashkiakun Veliaj dhe kryeministrin Rama, ku shkëmbyen dhurata simbolike. Për më shumë, klikoni këtu. Veliaj zbuloi në Instagram se kopshti u dëmtua nga tërmeti, por tani do të rindërtohet "nga mbështetja bujare e Duas për 300 fëmijë".

Kopshti po ndërtohet nga Sunny Hill Foundation, një fondacion i krijuar nga Dua i cili përqendrohet te kontributet në Kosovë dhe Shqipëri në aspekte të ndryshme, veçanërisht në art dhe kulturë. 

Sunny Hill Foundation u themelua rreth 5 vite më parë. Ceremonia hapëse u organizua përmes koncertit që këngëtarja mbajti në Prishtinë ku premtoi se gjithë të ardhurat do të shkonin për bamirësi. Në gusht të 2018, Sunny Hill Foundation dhuroi 100,000 euro për bamirësi, evente kulturore dhe shkolla të muzikës në Kosovë.