Mosha e duhur për t'u dhënë fëmijëve celularin e tyre të parë varet vërtet nga ju (prindërit/kujdestarët). Psikologët thonë se mosha nuk është aq e rëndësishme sa niveli i pjekurisë së fëmijës suaj, aftësia për të ndjekur rregullat në shtëpi dhe shkollë dhe ndjenja e përgjegjësisë si dhe nevojat e familjes.
Jerry Bubrick, një psikolog klinik dhe ekspert i ankthit në institutin Child Mind, thotë se këtë pyetje e bëjnë shpesh prindërit me fëmijë midis moshës 10 dhe 12 vjeç.
“Unë u them prindërve se nuk ka të bëjë aq shumë me një moshë të caktuar, por me vetëdijen sociale të një fëmije dhe të kuptuarit se çfarë do të thotë teknologjia,” shpjegon Dr. Bubrick. “Mund të kesh një 15-vjeçar vërtet të papjekur, ndërsa një 12-vjeçar vërtet të pjekur nga pikëpamja sociale që mund ta përballojë më mirë një telefon."
T'i jepni fëmijës suaj telefonin e parë është një vendim shumë personal dhe individual, por shumë fëmijë fillojnë t'i kërkojnë (dhe t'i marrin) që në shkollën fillore. Ky lloj presioni i bashkëmoshatarëve e bën më të vështirë për prindërit që duan t'i mbajnë fëmijët larg smartphone-ve.
Kur u jepni fëmijëve tuaj një celular, po u jepni atyre një mjet të fuqishëm për komunikim dhe prodhim mediatik. Ata mund të krijojnë tekst, imazhe dhe video që mund të ngarkohen në faqet e internetit menjëherë dhe të shpërndahen gjerësisht. Prindërit dhe kujdestarët duhet të konsiderojnë nëse fëmijët e tyre janë gati të përdorin telefonin me përgjegjësi dhe respekt.
Nëse mendoni se aftësitë teknologjike të fëmijëve tuaj janë më të mëdha se aftësia e tyre për ta përdorur atë me mençuri, kushtojini vëmendje këtij boshllëku. Ju mund të keni nevojë të thoni: "Jo, ende jo".
Këtu janë disa pyetje për t'u marrë parasysh:
- A tregojnë fëmijët tuaj një ndjenjë përgjegjësie, si për shembull t'ju bëjnë të ditur kur dalin nga shtëpia? A kthehen në shtëpi atëherë kur thonë se do të kthehe?
- A priren fëmijët tuaj të humbasin gjëra, të tilla si çantat e shpinës ose dosjet e detyrave të shtëpisë? Nëse po, prisni që ata të humbasin edhe telefonin.
- A duhet fëmijët tuaj të jenë në kontakt me ju për arsye sigurie?
- A do t'u bënte dobi atyre aksesi i lehtë te miqtë për arsye sociale?
- A mendoni se ata do ta përdorin celularin me përgjegjësi -- për shembull, duke mos dërguar mesazhe gjatë orës së mësimit ose duke i shqetësuar të tjerët me bisedat e tyre telefonike?
- A mund t'i përmbahen kufijve që ju vendosni për kur, ku dhe sa kohë mund ta përdorin telefonin?
- A do të përdorin me përgjegjësi funksionet e tekstit, fotografisë dhe videove dhe jo për të vënë në siklet apo ngacmuar të tjerët?
Burimi: Child Mind Institute, Common Sense Media
