Charlie Kirk, komentatori konservator amerikan dhe themelues i organizatës Turning Point USA (e cila kishte për qëllim promovimin e ideve konservatore midis studentëve dhe të rinjve), ka ndërruar jetë në moshën 31-vjeçare pas një sulmi me armë gjatë një ngjarjeje publike në Utah.
Ngjarja tronditi komunitetin politik dhe mediat amerikane, duke nxitur reagime të shumta nga figura publike dhe qytetarë, ndërsa po hetohet motivi i sulmit dhe kush është përgjegjës. Kirk, i martuar dhe baba i dy fëmijëve të vegjël, njihej për qëndrimet e tij politike të forta dhe për ndikimin e tij mes të rinjve konservatorë në Shtetet e Bashkuara.
Chris Pratt shkroi në X:
“Lutuni për Charlie Kirk tani, për gruan e tij dhe fëmijët e vegjël, për vendin tonë. Na duhet mëshira e Zotit. Zot na ndihmo.”
Dave Portnoy tha se ngjarja nuk është çështje e republikanëve apo demokratëve:
“RIP Charlie Kirk. Nuk ka rëndësi çfarë mendimi keni për të apo për politikën e tij, nëse nuk e shihni këtë si një nga ditët më të errëta në historinë amerikane, atëherë jeni pjesë e problemit.”
Ish-prezantuesja e “The View”, Meghan McCain, reagoi me një mesazh të fortë:
“Pusho në paqe Charlie Kirk. Gjurmët që ke lënë në botë do të jenë gjithmonë një bekim dhe një kujtim. Lutemi për prehjen tënde të përjetshme me Zotin tonë. Zoti e bekoftë familjen tënde gjithmonë dhe qoftë me fëmijët dhe gruan tënde Erika.”
Më pas ajo shtoi:
“Nëse mendoni se do t’i frikësoni e heshtni konservatorët që të mos flasin e të mos luftojnë për të vërtetën, Zotin, Amerikën, familjen dhe shpirtin e vendit tonë, nuk na keni njohur kurrë.”
Ndërkohë, ish-pilotja e garave Danica Patrick e quajti situatën “epidemi të sëmundjes mendore”:
“Çfarë nuk shkon me njerëzit? Kemi një epidemi të sëmundjes mendore. Po lutem fort për familjen e tij dhe për këdo që e ka njohur e dashur.”
Jake Paul shkroi:
“Charlie Kirk u qëllua për të vërtetën. Ka kaq shumë çmenduri sot. Na duhet Zoti më shumë se kurrë. Lutuni për familjen e Charlie-t dhe që këta njerëz të ligj të shërohen.”
Piers Morgan e quajti sulmin “të neveritshëm”:
“Një sulm i neveritshëm ndaj lirisë së fjalës dhe demokracisë. Charlie gjithmonë mirëpriste debat, me këdo. Kjo është e shpifur dhe zemërthyese. RIP Charlie.”
Brett Favre, ish-ylli i NFL, tha se ishte pa fjalë:
“Vetëm tragjike. Ju lutem mbani Charlie Kirk dhe familjen e tij në lutje…”
Shkrimtari Stephen King e pa ngjarjen si një tjetër shembull të dhunës me armë në Amerikë:
“Arsyeja e njeriut që qëlloi Charlie Kirk nuk është e qartë (ndoshta ishte i paqëndrueshëm mendor – duh). Por ajo që është e qartë: një tjetër shembull i dhunës me armë në Amerikë.”
Donald Trump, i cili e konsideronte Kirk aleat të ngushtë, e shpalli vdekjen e tij në Truth Social:
“I Madhi dhe madje Legjendari, Charlie Kirk, ka vdekur. Askush nuk e kuptoi më mirë Rininë e Amerikës sesa Charlie. Ai ishte i dashur e i admiruar nga TË GJITHË, sidomos nga unë dhe tani nuk është më mes nesh. Melania dhe unë i shprehim ngushëllimet gruas së tij të bukur Erika dhe familjes. Charlie, të duam!”
Kirk ishte i martuar me ish-Miss Arizona USA, Erika Frantzve, me të cilën kishte një vajzë 3-vjeçare dhe një djalë 1-vjeçar.
Shumë të famshëm të tjerë, përfshirë John Owen Lowe, Candace Cameron Bure, Gracie Hunt, Bernie Sanders dhe Jimmy Kimmel shprehën ngushëllimet e tyre, duke dënuar dhunën politike dhe duke kërkuar bashkim.
Senatori Bernie Sanders tha:
“Dhuna politike nuk ka vend në këtë vend. Duhet të dënojmë këtë sulm të tmerrshëm. Mendimet e mia janë me Charlie Kirk dhe familjen e tij.”
Jimmy Kimmel shtoi:
“Në vend të gishtit të drejtuar me zemërim, a mundemi për një ditë të vetme të pranojmë se është e tmerrshme dhe monstruoze të qëllosh një njeri tjetër? Në emër të familjes sime, i dërgojmë dashuri familjes Kirk dhe të gjitha viktimave të dhunës pa kuptim me armë.”
