Para pak orësh, një zjarr ka rënë në katin e nëndheshëm të Bibliotekës Kombëtare, pikërisht aty ku ndodhen antikuarët, dokumentet dhe librat e vjetër. Sipas "Shqiptarja.com", burimet në vendngjarje tregojnë se shkak për këtë ishte një shkëndijë elektrike.
Kanë mbetur të lënduar dy zjarrfikës dhe punonjësi i bibliotekës Arjan Ceci, por për fat të mirë, ndodhen jashtë rrezikut për jetën. Qe e vështirë për zjarrfikësit të shuanin flakët, për të mos dëmtuar edhe pjesën tjetër të librave. Deri më tani, ende nuk dihet deri në ç'masë është shkaktuar dëmi, por vetëm që shumë dokumenta të vjetra janë përfshirë nga flakët.
Në pamjet e publikuara nga “Report Tv”, dallohet tymi që ka përfshirë librat në raftet e gjendur në pjesën nëntokësore të ndërtesës së ish-Pallatit të Kulturës.
