Në një video të publikuar së fundmi në profilin e tij në Instagram, deputeti Erion Braçe ka ndarë një shqetësim që, për shumë njerëz është realitet: buka që blihet në dyqan, pas vetëm dy ditësh bëhet e fortë si gur.
“Me çfarë e bëjnë këtë bukën që ditën e dytë është ose kashtë, ose dru?!” shkruan Braçe në postimin e tij.
View this post on Instagram
Ai ironizon më tej:
“Besoj gjithë kjo ushtria e tatimorëve që ka dalë të na sigurojë ushqimin do e ketë një përgjigje. U bënë dy javë që bëjnë betejë për ushqimin e sigurt, apo jo?!”
Videoja e tij mori komente dhe nga qytetarë që ndanin të njëjtin shqetësim:
Mes komenteve, ishte dhe reagimi i Dhurata Thanasit, aktiviste e njohur për ushqyerjen e shëndetshme dhe administratore e profilit @lugaeargjente në Instagram.
Në komentin e saj, Thanasi shkroi:
"'Të vret me bukë në gojë' – kjo është shprehja e duhur. Quhet pabesi, zoti Braçe! Shumë bukë industriale ‘gruri të plotë’ bëhen me miell të bardhë, të cilit i shtohen krunde, shpesh një produkt i lirë mbeturinash."
Ajo shpjegoi se ky proces, i quajtur "rikonstituim" apo "rindërtim", përdoret nga industria për të ulur kostot dhe për të rritur afatin e ruajtjes, në kurriz të vlerave ushqyese të bukës.
“Sot industria, ajo që na i sjell në supermarkete miellrat dhe nëpër furra buke, përdor kokrra gruri të buta moderne (Triticum aestivum), të përzgjedhura për rendiment të lartë dhe forcë gluteni, jo për përmbajtjen ushqyese apo shijen,” shkruan Thanasi.
Thanasi, një nga zërat më të fortë në Shqipëri për edukimin ushqimor të familjeve, vë gishtin edhe te kultura e konsumatorit e shoqërisë sonë, e cila sipas saj, është bërë bashkëfajtore, sepse zgjedhim produkte që zgjasin më shumë në raft, por që ofrojnë më pak në pjatë.
Ajo bëri një paralelizëm të thjeshtë:
“Bëj një bukë me miell nga gruri autokton, pa përpunime industriale dhe ajo do të zgjasë 3-4 ditë para se të myket sepse është një produkt i gjallë, me enzima, lagështi natyrale dhe vlera ushqyese. Ndërsa buka që nuk myket, por vetëm bëhet si gur, është shpesh e mbushur me: alkool etilik, acid sorbik, propionat kalciumi, ose enzima që pengojnë mykun.”
Në fund të komentit të saj, me ironi dhe zhgënjim, ajo shtoi:
“Po unë i kam ca rrugëzgjidhje, janë të gjata por të qëndrueshme! Po askush nuk ma var dhe na e var!”
