Që prej ditës së djeshme, vazhdon kërkimi në familjen Lala, vila tre katëshe e së cilës u shemb tërësisht, në Kënetë, Durrës. Qentë e kërkimit janë të vendosur në rrënojat e vilës, por sërish nuk dihet asgjë për trupat e familjarëve.

I vetmi që arriti të nxirrej gjallë ishte 16-vjeçari, Ramë Lala, i cili prej kohësh komunikonte me forcat e emergjencës civile. Motra e tij, rreth 15 vjeçe, Griselda Lala rezulton e zhdukur. Nëna e Ramës dhe Griseldës gjendej në Tiranë gjatë ngjarjes së rëndë.

Të zhdukur rezutojnë edhe Marjeta Lala, nënë e katër fëmijëve. Deri tani, nuk ka asnjë informacion për fëmijët e saj, Emilio dhe binjakët Dionisa dhe Dionis. Vajza 6-vjeçare e Marjetës, Amelia Lala, u nxorr e pajetë. Bashkëshorti i Marjetës ndodhej në Itali gjatë tërmetit.

Përpos Amelias 6-vjeçare, dy viktimat e tjera të familjes janë e moshuara Sadete Lala dhe djali i saj i paralizuar, Iliri.

Gjendja shëndetësore e 16-vjeçarit Ramë Lala është e qëndrueshme.

Banorët e zonës pohuan për gazetaren Dorjana Bezat se familja Lala doli jashtë pas tërmetit të parë dhe më pas u rikthyen në banesë dhe qëndruan në katin e 2 për ta pasur më të lehtë për të dalë në rast rreziku, pasi kati i parë ka qenë i pabanueshëm vetëm me kolona. Pas tërmetit të dytë, shtëpia e tyre u anua pjerrtas dhe thuhet se banorët nuk mund të dilnin për shkak të bllokimit të dyerve. Disa orë më pas, shtëpia e tyre u shemb plotësisht.

Burimi: BalkanWeb