E dimë që jeta e të famshmëve duket si një tortë e madhe me bazë paratë dhe krem qejfi, por për habinë e askujt, s’është hiç ashtu. Të jesh yll popi – a hip hopi në këtë rast – do shumë, shumë punë. Tayna, për shembull, dha katër koncerte për 24 orë teksa xhironte dy videoklipe... Ngjan fizikisht e pamundur.
Reperja, që po shijon suksesin e “Pasite” me MC Kreshën dhe Lyrical Son, publikoi një video nga prapaskenat e xhirimeve të klipit. Është ulur në një stol, mban syzet në dorë dhe sheh në boshllëk. Të parit në boshllëk s'është kurrë shenjë e mirë. Fare mirë mund të thuash se e ka zënë gjumi ulur. Dikush e prek në shpatull dhe e njofton se duhet të çohet tani. Kushdo që ka punuar në sheshxhirim, çfarëdo sheshxhirimi, e ndjen në shpirt këtë video.
Ama, ka një anë pozitive. Në fillim të karrierës së saj, Tayna publikoi dy covera në YouTube nën emrin e saj të vërtetë, Doruntina Shala. Një prej tyre, është një miksim i “Wild Thoughts” dhe “Thirri krejt shoqet.” Dikur këndonte këngët e MC Kreshës dhe Lyrical Son, sot këndon me ta. A ka gjë më të bukur?
View this post on Instagram
“24 orë, 4 koncerte dhe dy klipe që vazhduan katër ditë, por në fund ia vlen gjithçka, kur mundohesh të argëtosh njerëzit që do dhe merr lëvdata. Jam shumë e lumtur dhe krenare për gjithçka. Nis nga një cover i këngës së tyre dhe tani jemi këtu, e gjitha në një vit e gjysmë. Faleminderit MC Kresha dhe Lyrical Son! Po bëjmë namin,” shkruan reperja.
Të gjithë bashkë, le të shprehim mirënjohje për punët tona 9 me 5.
