Në vitin 2014, drejtoresha artistike e Gucci-t asokohe, Frida Giannini, bashkëpunoi me artistin e make up-it Pat McGrath për të sjellë për herë të parë një linjë me produkte kozmetike: buzëkuq, pudër, blush dhe paleta për sytë. Gucci Beauty u la në harresë për disa vite, ndërsa së fundmi drejtori artistik Alessandro Michelle e riktheu sërish përmes një koleksioni me buzëkuqë.

Koleksioni është i përbërë nga 58 ngjyra të ndara në kategori të ndryshme në varësi të shkëlqimit dhe aromës. Fill sapo fushata u bë publike, njerëzit patën ndjesi të ndryshme. Siç mund ta shihni, Gucci ka përdorur bukurinë “e papërpunuar”, sjellë në një mënyrë paksa ndryshe. “Ideja e fushatës është një përfaqësim sa më afër realitetit, sa më njerëzor, ndonëse i çuditshëm,” u shpreh Michelle në një konferencë për mediat. “Por edhe e çuditshmja është njerëzore, e bukur.”

Fotot e realizura janë të drejtpërdrejta, larg shkëlqimit dhe gjithëpërfaqësuese. Për shembull, Dani Miller, këngëtarja e grupit punk Surfbort, pozon duke nxjerrë në pah dhëmbët e saj karakteristikë.

Disa ndjekës u zhgënjyen nga fotot e përzgjedhura, duke ironizuar se “më mirë do të shpenzojnë para te dentisti, sesa te buzëkuqët”. “A nuk është më në modë të shkosh te dentisti?”

Sigurisht që pjesa tjetër reagoi duke përgëzuar Gucci-n për mënyrën tejet të veçantë për të prezantuar koleksionin e ri. “Preferoj të shoh këtë reklamë, shumë larg dhëmbëve perfektë dhe të bardhë që shohim kudo,” shkruan dikush. “Pas këtyre fotove, ndjej se dhëmbët e mi janë në rregull,” shkruan një tjetër.

Shumica e vlerëson brendin luksoz për “thyerjen e tabuve dhe ripërcaktimin e bukurisë”. “Pajtohem 100% me këto imazhe. Më në fund në 2019-n, shoh foto të tilla.”