Pak minuta më parë, banorët e zonës së Astirit u përfshinë në një protestë të dhunshme para Kuvendit të Shqipërisë. Qytetarët tentuan të hynin me forcë në Parlament gjatë fjalës së kryeministrit Rama, gjë që solli përleshjen e tyre me efektivë të policisë.
Sipas “Gazeta Panorama” u plagosën 12 policë, mes tyre edhe nëndrejtori i Policisë së Tiranës, Dhimitraq Ziu. Burime nga policia bëjnë me dijeni se dy nga efektivët e plagosur janë rëndë, një policeje i janë prerë gishtat e dorës si shkak i shpërthimit të kapsollës që iu hodh, ndërsa një tjetër efektiv ka humbur dëgjimin nga njëri vesh.
Në ambientet para godinës së Parlamentit është parë të mbërrijë një ambulancë, e cila ka shoqëruar të plagosurit.
Mbi situatën në fjalë ka reaguar edhe Rama, i cili përmes një postimi në Twitter deklaron se “dhuna ndaj policëve në emër të paligjshmërisë, s’do tolerohet!” dhe bën thirrje për t’u larguar nga rruga. Të plagosur ka edhe nga ana e protestuesve, 3 prej të cilëve gjenden në spitalin e traumës.
Prej ditësh, banorët kërkojnë dëmshpërblim për prishjen e banesave që preken nga projekti për ndërtimin e Unazës së Madhe.
“Banesat do t’i mbrojmë me armë!” kanë deklaruar ata.
