Këtë vit do të mbahet edicioni i 20 i “Kënga Magjike”, një spektakël që si gjithmonë sjell surpriza dhe padyshim këngë që mbeten përherë hit. Këngëtarët e rinj dhe ata të afirmuar do të prezantohen çdo të dielë tek “E diela shqiptare”. Një pjesë e tyre është bërë publike nga Lajmi.net.
Ky edicion duket se do të ngjisë sërish në skenë Artiola Toskën dhe Brunon, që korrën mjaft sukses në “Kënga Magjike 2016” me këngën “Mirëmëngjes dashni”.
Eli Fara dhe Aurela Gaçe do të vinë me një bashkëpunim së bashku, po ashtu edhe Fifi, edhe pse emri tjetër nuk është zbuluar ende.
Flori Mumajesi, Ronela Hajati, Jonida Maliqi, Klajdi Haruni, Endri dhe Stefi, Stresi dhe Ardit Çuni do të jenë disa nga emrat që do të marrin pjesë për të disatën herë në spektaklin më të famshëm muzikor në vend.
Për herë të parë në “Kënga Magjike” vjen Ylli Limani, një ndër të rinjtë më të talentuar dhe më të suksesshëm në vend.
''Kënga Magjike'' u krijua dhe u udhëhoq nga Ardit Gjebrea në fillim të qershorit të vitit 1999, festival ku fituese e parë nga juria profesioniste u shpall Elsa Lila me këngën ''Vetëm një fjalë’’.
Me kalimin e viteve, festivali u kthye jo vetëm në të preferuarin e simpatizantëve të muzikës, por edhe të publikut, vëmendja e të cilit kaloi kufijtë. Një pjesë e fituesve ndër vite kanë qenë shqiptarë të Kosovës, si Ema Bytyçi me ''Ku je ti’’, Genta Ismajli ''Nuk dua tjetër’’, Armend Rexhepagiqi ''Kur dashuria vdes’’, Eliza Hoxha në bashkëpunim me Rosela Gjylbegu rrëmbyen çmimin e parë me ''Rruga e zemrës’’.
