Almeda Abazi ka kërcyer dhe ka kënduar nën tingujt e këngës së njohur ‘Sway’ , gjatë finales së Këngës Magjike. Bashkë-prezantuesja e këtij edicioni e ka shfaqur veten edhe në një fushë tjetër, ku nuk e kishim parë më parë. Almeda ka luajtur në disa seriale turke, si ‘Konak’ apo, ‘Sulejmani i Madhërishëm’, ndërsa vitin e fundit i është besuar drejtimi i një formati televiziv turk me udhëtime në vende të ndryshme të botës. Si kërcimtare ajo e ka sprovuar veten në ‘Dancing With the Stars’ Turkey, duke u renditur e 3-a. Ndërsa në finalen e Këngës Magjike Almeda ka provuar të këndojë, duke interpretuar e kërcyer me këngën ‘Sway’, e shoqëruar nga trupa e balerinëve të TV Klan. Siç tregoi prezantuesi Ardit Gjebrea, kompozitori Adrian Hila pasi e kishte dëgjuar kishte thënë se ‘Almeda mund të këndojë’.
Almeda Abazi është një ndër fytyrat më të njohura në Turqi. Ajo është kthyer në skenat shqiptare pas shumë vitesh, dhe ka qenë në qendër të vëmendjes si bashkë-prezantuesja e Këngës Magjike. Në nisje të natës finale, ajo ka shprehur mirënjohjen ndaj publikut shqiptar dhe ka thënë: ‘Nuk dua të iki!’
