Ahmed Kalaja mund të dënohet me 3 vite burg, ose të marrë dënim me gjobë, për shkak të një akuze ku pretendohet se ka penguar hetimet gjatë një operacioni të anti-terrorit në 2022-shin.
Prokuroria e Tiranës e ka çuar në gjykim dosjen ndaj imamit të njohur në rrjetet sociale, i cili drejton edhe xhaminë “Dine Hoxha” në Tiranë. Vepra penale për të cilën akuzohet Ahmed Kalaja është “Veprime që pengojnë zbulimin e së vërtetës”, e cila supozohet të jetë kryer në bashkëpunim.
Sipas akuzës, ai ka penguar hetuesit e drejtorisë së anti-terrorit që të shihnin pamjet e sigurisë të kapura nga kamerat e xhamisë, duke refuzuar t’i dorëzojë ato. Hetimet lidheshin me persona që dyshohej se shpërndanin fletushka me thirrje për dhunë dhe përçarje mes besimtarëve.
Ahmed Kalaja reagoi për Euronews, duke thënë se e gjitha ishte një “keqkuptim” dhe se në çdo hap të procesit, ka bashkëpunuar me hetuesit.
