Aktorja dhe deputetja Adriana Matoshi, përmes një publikimi në Facebook ka bërë me dije se është diagnostikuar me një sëmundje të re. Ajo tregoi se në muajin e shenjtë të Ramazanit, po lë njerëzit e dashur për t’u kuruar, por po shkon për t’u rikthyer sërish.
“Edhe një tjetër…Në çastin që e ke zbuluar kush është armiku yt, gjysmën e betejës e ke fituar. E, unë në jetë i konsideroj vetëm dy armiq:
- Ata që të rrahin krahët e të qeshin në fytyrë, por të shkelin e të poshtërojnë pas shpine;
- Shëndetin kur të tradhton atëherë kur mendon se je e gatshme të mbash një mal mbi supe”, e nisi ajo statusin.
Më tej, vijoi:
“Sëmundjet e mia i kanë hapur gjithmonë shumë perde dhe kanë shfaqur fytyra të shumta pa maska. Njerëz të shumtë që kanë qeshur më shumë me problemet e mia, sesa me sukseset e mia. Sonte, dua t’i gëzoj këto zemra të liga dhe të vogla dhe t’i shqetësoj shumë zemra të buta prej madhështisë njerëzore e t’u jap lajmin që prej disa kohësh po përballem me një sëmundje të re”.
“Që ta dini të plotë, thashë t’ju tregoj që problemi im ka filluar para paraqitjes sime televizive në Festivalin e Këngës në RTSH. Nuk kam lejuar as vizita mjekësore që të zhvillohen në ditët kur kemi pasur mbledhje në Kuvend e në emisionet ku jam përgjegjëse. Kam qenë prezente për të gjithë, veç për veten jo”.
Adriana shtoi:
“Shëndeti më tradhtoi prapë. Të gjithë po mendoni se kjo është një shenjë që duhet ta ul ritmin e jetës dhe angazhimet. Në këtë muaj të shenjtë, po i lë prapë fëmijët e mi, prindërit e mi, punën time, çdo angazhim të mundshëm, shoqërinë që më do. E, edhe juve me maska. Po marr veç Zotin dhe lutjet e mia e të më të dashurve, për operimin e radhës. Unë edhe sonte po shtrihem në spital, për t’u kthyer prapë. Inatin, urrejtjen dhe vrerin që vjellin çdo ditë përmbi emrin tim, po shkoj ta largoj nga trupi im. Unë prapë ju dua shumë! Më shumë se ju që ma doni të keqen dhe ma uroni vdekjen, edhe publikisht”.
“Unë po shkoj për t’u kthyer. Inshallah ky muaj i shenjtë, urrejtjen jua kthen në dashuri. Po shkoj. Ju lutuni që unë të kthehem mirë. Unë po lutem që t’ju gjej juve më mirë se kurrë më parë”, përmbylli ajo.
Tre vite më parë, Adriana ka konfirmuar për ndjekësit se i ishte rikthyer tumori në tru dhe dha mesazhin se të gjithë duhet ta duam veten. Pas operacionit i cili shkoi mirë, Adriana u shpreh se e mbajti premtimin e dhënë dhe u rikthye. Shpresojmë që edhe këtë herë gjithçka të shkojë mirë.
