
Nëse je gati për të përshëndetur verën dhe për të përqafuar energjinë e ngrohtë të vjeshtës, ndryshimi i stilit të flokëve është mënyra më e mirë për të nisur sezonin. Nga ngjyrat e ngrohta te prerjet me shkallëzim, këto janë 9 trendet e flokëve për vjeshtën 2025 që do t’i shohësh gjithandej, në Instagram, TikTok, rrugëve të qytetit dhe, me shumë gjasa, para pasqyrës!
1. Prerja "flutur"
Si Sabrina Carpenter. Prerja “flutur” është kthyer në një nga më të kërkuarat, sidomos për vajzat që duan volum pa humbur gjatësi. Flokët priten me shkallëzim të theksuar rreth fytyrës dhe te pjesa e sipërme. Rezultati? Volum, elegancë dhe një pamje luksoze, por pa shumë mundim.
2. Bionde "perlë"
Nga biondja "skandinave" e verës te biondja "perlë" e vjeshtës. Ngjyra është e lehtë, me nuanca të ftohta dhe reflektime që duken super chic. Ideale për ato që s’duan të humbasin shkëlqimin e verës, por janë gati për diçka më të sofistikuar.
3. Flokë në ngjyrë natyrale bronzi
Jo shumë të ngrohta, jo shumë të ftohta, e bronzta natyrale është ngjyra që shkon për këdo. S’ka nevojë për mirëmbajtje të shpeshtë, duket gjithmonë e freskët dhe është perfekte për t’u përshtatur me ngjyrat e vjeshtës.
4. Baluke të holla
Duken të lezetshme dhe s’ka nevojë të angazhohesh për një “pispillosje” të plotë. :) Baluket e holla janë një ndryshim i vogël, por që bën diferencën; i shtojnë dimension fytyrës dhe nuk dominojnë gjithë pamjen tënde.
5. Ngjyra "kanellë"
Këtë vit të gjithë po kërkojnë nuancën e kanellës, një nuancë më e ngrohtë, më e thellë dhe me shumë sharm. Kujdes: është pak më kërkuese në mirëmbajtje, ndaj nëse vendos për të, konsultohu me një parukier profesionist për të gjetur tonin ideal për lëkurën dhe sytë e tu.
6. Ngjyrë kadife
Ky trend është për ato që duan thellësi, sofistikim dhe një ngjyrë që ndriçon me dritën. Ngjyra është si një kafe e zbutur me një prekje gri, perfekte për vjeshtë dhe shuuumë chic. Dhe, më e bukura? Duket gjithmonë *e shtrenjtë*!
7. Bob modern
Prerja bob nuk del kurrë nga moda, por këtë vjeshtë vjen më e gjatë dhe me më shumë "lëvizje". Jo më prerje të drejta, versioni i këtij viti është më i lehtë për t’u stiluar dhe duket bukur si me onde, ashtu edhe i drejtë.
8. Flokë të mbledhura pastër
Xhel për flokët në dorë dhe flokët e tërhequra pas, stilimet e pastra si bishtat e lartë, gjysmë topuzët apo topuzët e tërhequr fort pas koke janë on top këtë sezon. Janë modele praktike për ditët me erë, por edhe një mënyrë për t'u dukur elegante pa shumë përpjekje.
9. Krehje me volum
Po, krehjet alla "Cindy Crawford" janë rikthyer. Me ndarje anësore dhe shkëlqim maksimal, ky stil është për ato që duan volum, lëvizje dhe pak drama në përditshmëri. Ideal për sezonin e eventeve, festave dhe fotove “spontane” në Instagram.