E njohim të gjithë të paktën një prej tyre. Ai personi “i heshtur” në grupin e WhatsApp-it.
Është gjithmonë aty, lexon çdo mesazh, meme dhe plan për fundjavën, por kur vjen puna për të reaguar? Heshtje totale.
Në fillim mund të duket misterioze, ose paksa bezdisëse. Pse të jesh pjesë e grupit nëse nuk ke ndërmend të flasësh?
Por nëse shikon më nga afër, kupton se nuk ka të bëjë me mungesë interesi, por me tipare personale.
Shtatë cilësi që zakonisht i kanë ata që ndjekin në heshtje bisedat, pa shtypur kurrë "Dërgo":
1. Janë vigjilentë
Anëtarët e heshtur të bisedave nuk janë të painteresuar, ata i kushtojnë më shumë vëmendje sesa mendon mesazheve.
Në vend që të reagojnë menjëherë, shohin kush i përgjigjet kujt dhe kuptojnë dinamikat e fshehta të grupit. Ky tipar nuk kufizohet vetëm te grupet e bisedës. Në jetën reale, janë ata që kapin ndryshimin e gjuhës së trupit apo tensionin e pashprehur në një takim.
Qetësia e tyre nuk do të thotë që nuk e kuptojnë situatën, madje shpesh do të thotë që e kuptojnë më shumë se të tjerët.
2. Shmangin konfliktet e panevojshme
Sa herë ka ndodhur që ka mjaftuar një shaka është keqkuptuar në grupin e bisedës dhe gjithçka ka dalë jashtë kontrollit?
Pikërisht për këtë arsye, disa njerëz zgjedhin të mos thonë asgjë. Teksti nuk ka ton, dhe ata që nuk duan përplasje, e dinë sa lehtë mund të keqinterpretohet një mesazh.
Nuk është se kanë frikë të flasin, thjesht janë strategjikë. Nëse një temë është shumë e ndjeshme, ata preferojnë të qëndrojnë në heshtje sesa të hedhin benzinë në zjarr.
3. Kursejnë energjinë e tyre
Jo të gjithë kanë një “bateri sociale” të njëjtë. Për disa, të përgjigjesh në çdo mesazh e meme është si një maratonë që nuk e kanë zgjedhur vetë.
Ata që lexojnë por nuk përgjigjen, zakonisht vlerësojnë energjinë e tyre. Edhe të shkruash një “haha” kërkon përpjekje dhe ndoshta atë ditë nuk kanë nerva për ta bërë.
Heshtja e tyre nuk ka të bëjë me ty, ka të bëjë me mënyrën se ku zgjedhin të përqendrojnë vëmendjen e tyre.
4. Janë introvertë
I lexojnë të gjitha, qeshin me disa, por nuk shkruajnë asnjë fjalë.
Pse? Sepse introvertët ndihen më rehat duke përthithur sesa duke kontribuar. Prania për ta nuk nënkupton domosdoshmërisht pjesëmarrje aktive.
Kjo vlen edhe jashtë botës digjitale. Introvertët shpesh lodhen nga ndërveprimet në grup, por prapë i shijojnë në mënyrën e tyre, nga distanca.
5. Janë të kujdesshëm
Ata që rrijnë të heshtur në biseda shpeshherë janë shumë të kujdesshëm me fjalët. Nuk duan të thonë diçka që nuk përfaqëson saktësisht mendimin e tyre.
Zakonisht, preferojnë të flasin në biseda individuale ose vetëm kur kanë diçka që me të vërtetë ia vlen të thuhet. Për ta, cilësia ka më shumë rëndësi se sasia.
6. Janë të rezervuar
Në çdo grup ka nga ata që ndajnë gjithçka dhe nga ata që preferojnë t’i mbajnë gjërat për vete.
Kjo është thjesht mënyra e tyre për të ruajtur kufijtë personalë.
7. E vlerësojnë më shumë kontaktin në jetën reale
Grupet mund të jenë shpëtimtare, por për disa njerëz, asgjë nuk zëvendëson një takim sy më sy. Ata që qëndrojnë të heshtur, thjesht mund të jenë duke ruajtur energjinë për një bisedë reale.
Për ta, asgjë nuk e zëvendëson një kafe me shoqëri, të qeshurat apo kontaktin njerëzor. Nuk do t’i shohësh të dërgojnë emoji në grup, por kur jeni bashkë, janë të pranishëm në të gjitha diskutimet.
