Pavarësisht sa herë i dëgjoni këngët tuaja të preferuara, pas një ndarjeje, dhimbja mbetet aty dhe shpesh është e vështirë për t’u kapërcyer. Mbyllja e një kapitulli kaq të rëndësishëm në jetën tuaj, siç është një marrëdhënie romantike, rrallëherë është një përvojë e lehtë.
Por ajo që duhet të mbani mend është se, për një periudhë kohe, ju dhe ish-partneri juaj zgjodhët të jeni pjesë e jetës së njëri-tjetrit. Mes jush ka pasur dashuri e respekt dhe kjo nuk humbet vlerën, edhe nëse marrëdhënia përfundon.
Megjithatë, kjo lloj humbjeje mund të lërë gjurmë në vetëbesimin dhe mirëqenien emocionale. Prandaj, më poshtë gjeni disa këshilla që mund t’ju ndihmojnë ta kaloni më lehtë këtë periudhë sfiduese.
1. Merr kohën tënde për të vuajtur
Dhimbja pas një ndarjeje nuk është dobësi, është pjesë e procesit të shërimit. Çdo njeri që hyn në jetën tonë vjen me një qëllim: për të na mësuar diçka, për të na ndryshuar apo për të na ndihmuar të rritemi. Marrëdhëniet na ndihmojnë të kuptojmë më shumë për veten tonë, për nevojat dhe kufijtë tanë. Pranoje dhimbjen, lejoje veten të qash, të ndjesh, të reflektosh.
2. Krijo hapësirë për shërim
Shumë njerëz zgjedhin të fillojnë një marrëdhënie të re menjëherë pas ndarjes, por ndonjëherë ajo që vërtet nevojitet është një pauzë për t’u kujdesur për veten. Jepi vetes kohë për të bërë gjërat që të sjellin gëzim dhe qetësi: një banjë relaksuese, një film që ke dashur gjithmonë ta shohësh, një libër që të frymëzon, apo thjesht riarredimi i shtëpisë sipas dëshirës tënde. Kujdesu për veten, sepse tani më shumë se kurrë, ti je personi më i rëndësishëm në jetën tënde.
3. Kalo kohë me miqtë
Njerëzit që të qëndrojnë pranë janë shumë të rëndësishëm në kohë të vështira. Flisni me miqtë, familjarët apo dikë që ju kupton. Ndarja e emocioneve nuk është shenjë dobësie, është një mënyrë për të lehtësuar barrën emocionale. Ata mund të të ndihmojnë të shohësh situatën ndryshe dhe të rindërtosh vetëbesimin.
4. Rigjej veten
A ka diçka që gjithmonë ke dashur të bësh, por që e ke lënë mënjanë për shkak të lidhjes? Tani është momenti ideal për ta bërë. Qoftë një hobi i ri, një kurs, një projekt personal apo thjesht udhëtimi që e ke shtyrë gjithmonë, fokusohu në gjëra që të rrisin dhe të mbushin me energji. Jepi vetes mundësinë të zhvillohesh si individ.
5. Mos e gjyko veten
Mos e fajëso veten. Mos e ndëshko veten. Ndarjet ndodhin, edhe kur dy njerëz kujdesen për njëri-tjetrin. Jo të gjitha marrëdhëniet janë të destinuara të zgjasin përgjithmonë dhe kjo nuk i bën ato më pak të rëndësishme. Është normale të reflektosh mbi atë që ndodhi, por mos lejo që të tjerët, apo vetja, të të bëjnë të ndihesh më pak e vlefshme. Ti je duke mësuar, duke u rritur dhe duke ecur përpara. Dhe kjo është diçka për t’u vlerësuar.
Burimi: Marie Claire
