Jo të gjithë njerëzit që të rrethojnë duan realisht të të shohin duke ecur përpara. Disa janë pranë teje për çdo lajm, çdo dramë, çdo detaj, por energjia e tyre ndryshon çuditërisht sipas asaj që po ndodh me ty.
Nuk është gjithmonë e lehtë për t’u dalluar sepse këta njerëz nuk duken si armiq. Duken “shokë”, “kushërinj”, “kolegë”, madje ndonjëherë edhe njerëz shumë të afërt.
Ja si duken këto situata në jetën reale:
1. Kur ke sukses, reagimi është i vakët. Kur dështon, papritur kanë shumë për të thënë.
E ke vënë re atë momentin kur ndan një lajm të bukur me dikë: një promovim, një projekt të ri, një lidhje që po shkon mirë dhe reagimi që merr është diçka mes “ok” dhe një buzëqeshjeje të ftohtë?
“Mirë, bravo… po a do e përballosh dot?”
“Të shohim sa do zgjasë.”
Por kur gjërat nuk shkojnë mirë? Kur diçka prishet, dështon, mbaron? Papritur analiza bëhet e detajuar. Kanë teori, kanë këshilla dhe komente për çdo hap që bëre gabim. Diferenca në entuziazëm është ajo që flet më shumë se fjalët.
2. Janë gjithmonë shumë kuriozë për dramat e tua
Ka njerëz që kur ti je mirë, janë të zënë. Por sapo ndodh diçka e keqe, janë çuditërisht gjithmonë të disponueshëm.
“Tregomë çfarë ndodhi.”
“Po pastaj çfarë të tha?”
“Po familja çfarë mendon?”
Duket si interesim, por shpesh ka një lloj qetësie të çuditshme në mënyrën si e dëgjojnë historinë tënde. Si të ishte një serial që po ndjekin me shumë vëmendje.
Nëse nuk të japin zgjidhje reale, nuk të lehtësojnë peshën, thjesht shfrytëzojnë situatën për të të parë në telashe.
3. Këshillat e tyre të mbajnë gjithmonë në vend
Sa herë që ti do të bësh një hap përpara, ata janë zëri i parë i dyshimit.
Do të aplikosh për një punë më të mirë?
“Eh, tregu është i vështirë, pse të zhgënjehesh kot.”
Do të nisësh një biznes, një projekt, një ndryshim?
“Po je i/e sigurt? Mos rreziko shumë.”
Sigurisht, kujdesi është i nevojshëm. Por kur çdo hap i yti shoqërohet me frikë, dyshim dhe paralajmërime negative, modeli fillon të bëhet i qartë. Ata nuk po të mbrojnë, por po të frenojnë sepse versioni yt që rritet, guxon dhe arrin gjëra, i vendos ata përballë pasigurive të tyre.
4. Kur je emocionalisht keq, të minimizojnë ndjenjat
Një nga shenjat më të forta është mënyra si reagojnë kur ti je realisht i/e lënduar.
Në vend që të të dëgjojnë, thonë:
“Po ka njerëz me probleme më të mëdha.”
“Mos e bëj kaq të madhe.”
“Je shumë dramatik/e.”
Nuk bëjnë përpjekje për të kuptuar si ndihesh, por ka vetëm ulje të intensitetit të ndjenjave të tua. Dhe kur dikush nuk arrin të tregojë empati në momentet më të vështira, duhet të pyesësh veten pse.
Njerëzit që duan realisht të të shohin mirë, nuk ndihen më mirë kur ti je keq. Ata nuk e përdorin dobësinë tënde si fitore për veten.
