Një grua e identifikuar me emrin Bedrie Loka, nënë e katër fëmijëve, i dha fund jetës në fshatin Sukth të Durrësit duke pirë fostoksinë.
Shkak për fundin fatal të 41-vjeçares, sipas familjarëve, por edhe reagimit të policisë së Durrësit, është bërë publikimi i disa videove-montazh, me fotografinë e së ndjerës dhe një gjuhë denigruese dhe urrejtje ndaj saj. Kjo e fundit, nuk e ka përballuar dot presionin dhe vendosi t’i japë fund jetës në mënyrë tragjike duke pirë fostoksinë.
Ngjarja e rëndë, por që ka marrë vëmendje të madhe mediatike, ka ndodhur ditën e djeshme, që në fakt për të ndjerën dhe familjen e saj duhet të ishte një ditë feste, pasi e bija kishte ditëlindjen. Detajet tronditëse vijnë nga një e afërme e Bedries, e cila i ka qëndruar pranë në spital në orët e fundit të jetës. Pak minuta para se të ndërronte jetë, Bedria ka uruar të bijën për ditëlindjen e saj dhe duket se ky ishte mesazhi i saj i fundit.
E ndjera punonte prej disa vitesh në një fabrikë prodhimi litarësh në Sukth të Durrësit, ndërsa i shoqi ishte punëtor sezonal në Greqi. Ky i fundit ka ardhur pranë familjes për ditët festive dhe pas ngjarjes së rëndë ka reaguar duke dhënë dëshminë e tij.
Ai dyshon se fotot janë shpërndarë nga kushërira e së ndjerës. Madje, në dhjetor të vitit të kaluar në policinë e Durrësit është regjistruar një tjetër denoncim për hapjen e profilit të rremë në emrin e Bedries.
Në lidhje me këtë kallëzim, policia deklaroi se e ka referuar çështjen në prokurori, ndërsa familjarë dhe drejtues të fabrikës ku punonte e ndjera japin një tjetër version për ngjarjen. Ata thonë se një konflikt me kolegët në vendin e punës është bërë shkak për gjithë këtë histori.
Familjarë dhe të afërm të së ndjerës kanë thënë se çështja u mbyll pas largimit nga puna të punonjëseve të përfshira në këtë rast, pas një konflikti banal të nisur në vendin e punës.
Për ngjarjen në fjalë, kanë reaguar shumë personazhe publikë shqiptar, së fundmi edhe ministri Taulant Balla dhe Elisa Spiropali me thirrjen për të ndalur sa më parë gjuhën e dhunës dhe urrejtjes ndaj grave.
Prokuroria ka nisur hetimet për zbardhjen e këtij rasti dhe vënien para ligjit të personave që kanë keqpërdorur të dhënat e së ndjerës, ndërsa shoqëria civile ka njoftuar mbajtjen e një proteste ditën e nesërme.
Burimet ndihmëse: Euronews Albania, BalkanWeb
