Grida Duma ishte një nga ata personazhe të politikës që gjithmonë ka ngacmuar kuriozitetin e njerëzve për ta dëgjuar edhe kur nuk ishin dakord me të. Thënë kjo, po i njëjti kuriozitet e shoqëroi ish-deputeten e Partisë Demokratike në rrugëtimin e ri, këtë herë nën drejtimin e “Top Story” në Top Channel. Si u komentua Grida, jashtë partisë, por sërish brenda politikës?
Në pjesën dërrmuese të komenteve në YouTube, vihet re një qasje tepër pozitive ndaj Gridës si drejtuese e emisionit politik. Të shumtë janë njerëzit që e vlerësojnë për “frymën perëndimore”, “të qenit e përgatitur” dhe faktin që përfshihen në debat pa lexuar vetëm pyetjet e skaletës.
Ndërkohë në Instagram, komentet janë më të larmishme. Disa vënë në dukje faktin që Grida – një figurë që njihet për komunikimin – duhet të flasë “më qartë”. Të qenit lehtësisht e kuptueshme për masën pa humbur stilin që e karakterizon, duket se do të jetë një sfidë e re për Gridën në ekran.
Disa ndjekës shkruajnë se “i përshtatet emisioni”, e disa nuk janë dakord. Shijet janë personale. Dikush sugjeron që “duhet t’i jepet hapësirë që të ambientohet në këtë pozicion të ri”.
Të tjerë shikues këshillojnë që emisioni të ketë më tepër ritëm dhe mbetet për t'u parë se sa e njëanshme do të jetë Grida në debat.
