Mund të jetë e vështirë që edhe njerëzit e shëndetshëm të gjejnë lumturinë. Por për ata që marrin një diagnozë që ndryshon jetën (ose kanë të afërm që përballen me të), kjo bëhet edhe më sfiduese. Megjithatë, nuk është e pamundur. Për disa njerëz, një diagnozë e tillë i detyron më në fund të ndryshojnë pjesë të jetës që i kishin lënë pas dore për vite me radhë.
Në çdo rast, një diagnozë e rëndë të bën të rishikosh përparësitë dhe atë që ka vërtet rëndësi në jetë. Edhe pse kjo mund të jetë e frikshme apo paralizuese, ekspertët thonë se mund të shndërrohet në një zhvillim pozitiv. Një diagnozë është një ngjarje e madhe që sjell ndryshime, sfida dhe rritje personale. Ajo kërkon ndryshim të rutinës së përditshme dhe shoqërohet me një përzierje emocionesh gjatë procesit të përballimit.
Megjithatë, ka edhe një anë pozitive: ekspertët shpjegojnë se një diagnozë e rëndë shpesh sjell një qartësi që rrallë arrihet ndryshe, duke e bërë më të vështirë të injorohen problemet ekzistuese në jetë. Përballë kohës së kufizuar ose pasigurive për të ardhmen, shumë njerëz ndërmarrin më në fund ndryshime që i kanë shtyrë për një kohë të gjatë.
Ja pse një diagnozë e tillë i shtyn njerëzit të ndryshojnë:
Vendos në perspektivë problemet e vogla
Psikologia Xhojs Fain sugjeron që personat me një diagnozë që ndryshon jetën duhet të përqendrohen më shumë te njerëzit që duan, të relativizojnë problemet luksoze të përditshmërisë dhe të jenë të vetëdijshëm për lumturinë që mund të përjetojnë në momentin aktual, pavarësisht nëse u mbeten vite apo vetëm pak kohë për të jetuar.
Studimet tregojnë se sëmundjet kronike mund të kuptohen si një proces transformues: jo thjesht diçka që i ndodh njeriut, por diçka që ai e përjeton në mënyrë aktive. Ky ndryshim në mënyrën e të menduarit ndihmon për të ruajtur kontrollin dhe për t’u përshtatur.
Përqendron vëmendjen te gjërat që kanë rëndësi
Terapisti i familjes Stjuart Fensterheim thekson se një sëmundje e rëndë të bën të kuptosh mundësitë e humbura, por njëkohësisht të shtyn drejt lumturisë, sepse nxit dëshirën për ta jetuar çdo ditë me kuptim. Ai thekson rëndësinë e të jetuarit në maksimum, në mënyrë që jeta të ketë ndikim pozitiv si për veten ashtu edhe për të tjerët.
Jep shtysë për t’u përfshirë plotësisht në jetë
Psikologu Eliot Lebou, i cili jeton me një sëmundje kronike, shpjegon se diagnoza e tij u bë një motivim për ta jetuar çdo ditë në maksimum. Ai vendosi të vizitojë vende të reja, të provojë gjëra të panjohura dhe të shijojë jetën më shumë se më parë.
Të lejon të shkëputesh nga rregullat e zakonshme
Sëmundja mund të shërbejë si një mundësi për të rivlerësuar jetën dhe për t’u çliruar nga kufizimet që pengojnë zhvillimin personal. Punonjësja sociale Xhilian Frazin inkurajon njerëzit të përdorin këtë kohë për të ndryshuar gjëra që më parë nuk do t’i kishin marrë në konsideratë. Për disa, mbështetja psikologjike ndihmon në marrjen e vendimeve më pozitive dhe në gjetjen e motivimit për të vazhduar përpara.
Jep arsye për të vazhduar përpara
Një e mbijetuar e kancerit, tregon se ndryshoi jetën duke u përqendruar tek arritja e qëllimeve të vogla. Sipas saj, nuk bëhet fjalë për guxim apo forcë, por thjesht për të vazhduar përpara çdo ditë. Ndoshta pikërisht kjo është forma më e vërtetë e guximit, ndërsa lumturia vjen gjatë rrugës.
Të kesh një qëllim në jetë është thelbësore. Ndryshimi nuk ndodh pa veprim, ndaj është më mirë të mos pritet që lumturia të vijë vetë, por të bëhen ndryshimet që janë shmangur deri tani.
