Fakt: Nuk është hera e parë që dikush i këndon dashnores, si Nora me “Anna”, Era Rusi me “Mos ma merr”, të dyja të ngjashme me “Jolene” të Dolly Parton, ose dikush këndon nga këndvështrimi i dashnores, si Gili me “Dashnorja”, Artjola Toska me “Unë e jotja më nuk jam”, Rosela Gjylbegu me “Tjetra”, Anxhela Peristeri me “Si po jetoj”, Samanta me “Ti s’e din se”, Enca me “Dua” etj. Por, kënga e Robert Berishës kushtuar dashnores është e çuditshme.
Së pari, teksti. Kënga nuk ka një refren, por mjaftohet me dy strofa me katër vargje, të cilat përsëriten 2 herë secila.
Jam i ulur unë në tavolinë
Dhe po e pi unë një gotë raki.
Po mendoj për dashnoren time
M’ka marr malli me ja pa dy sytë e zinj (2x)
I dehur unë ashtu siç jam
Marr rrugën o për në shtëpi
Çdo cep, o çdo cep të rrugicës
Moj e dashur po më shfaqesh ti (2x)
“Shumë e çuditshme,” shkruan dikush në YouTube. “Katër rreshta këngë. Sado që dua ta pëlqej, s’po më jep arsye,” lexohet në një tjetër koment. “Si serialet turke u bëtë,” shton një tjetër.
Së dyti, kujt i drejtohet? Nisur nga teksti, kuptohet vetëm që është dikush, i ulur në tavolinë që pi një gotë raki dhe e mendon për dashnoren. Pastaj çohet dhe niset në shtëpi, e rrugës i shfaqet ajo. Në Kosovë, ndodh që me termin dashnore t’u drejtohen edhe të dashurave, ndërkohë që në Shqipëri nënkupton të paturit një marrëdhënie të jashtëligjshme me dikë. Për cilën e ka Roberti?
Sërish dyshim. Në një intervistë për “Ftesë në pesë”, Berisha u shpreh se “nuk ka shqiptar që nuk ka dashnore”. Pastaj shtoi: “Gruaja ka vendin e vet në shtëpi, edhe dashnores duhet t’i dedikojmë këngë. Se edhe ato të shkretat kanë nevojë që të përmenden.” Në vijim, ai shtoi se vetë nuk ka dashnore, thjesht do të interpretojë këngën e shkruar nga dikush tjetër.
Nëse keni 3 minuta e 13 sekonda kohë, dëgjojeni.
