Nëse kaloni nga profili i Era Istrefit tani, komenti më i përsëritur që do të gjeni është "RIP"(Rest in Peace). Fotot e fundit që këngëtarja ka publikuar kanë kaq shumë komente në të cilat lexohet "RIP" sa të bëjnë të mendosh se diçka ka ndodhur.
Anabel.al u interesua dhe Nora Istrefi siguroi se nuk ka asnjë të vërtetë dhe padyshim Era gëzon shëndet të plotë. E gjithë kjo duket se është një "kryengritje" fansash, të cilët janë të shqetësuar pasi këngëtarja ka kohë që nuk është më aktive.
Postimi i saj i fundit në Instagram daton që në dhjetor dhe nga kënga e fundit ka kaluar gjithashtu shumë kohë.
Ndonëse fjala "RIP" të bën të mendosh më të keqen, duke marrë parasysh që një pjesë e mirë e fansave të këngëtares janë adoleshentë, është e kuptueshme lehtësia me të cilën e përdorin. Fansat e flaktë pjesa më e madhe e të cilëve janë adoleshentë, nuk e kuptojnë rëndësinë e lajmeve të vdekjes apo se çfarë pasoje mund të shkaktojë përdorimi në masë i fjalës "RIP".
Në fakt kjo s'është hera e parë që llogaria e Era Istrefit bombardohet nga fjala "RIP" apo komente ngushëlluese. Në 2016-ën, Era Istrefi postoi një foto në Instagram ku shkruante ‘Kështu ju shoh unë nga Parajsa’ për të treguar ndoshta se ndihej "si në parajsë" pas suksesit ndërkombëtar që mori, por fansat e morën më seriozisht se ç'duhej.
Njësoj si tani, që kërkojnë dëshpërimisht një reagim nga këngëtarja dhe duken aq të ndjeshëm sa mendojnë më të keqen!
