Duket se fansat nuk janë aspak të kënaqur mbi mënyrën si producentët David Benioff dhe D.B Weiss kanë ndërtuar sezonin e fundit të “Game of Thrones”. Si rrjedhojë, të enjten në mëngjes nisi një peticion online ku theksohet se sezoni final i serialit të famshëm duhet të ribëhet.

Qëllimi është që të grumbullohen 500,000 njerëz  të pakënaqur nga sezoni i tetë. Momentalisht (16:24) 389,726 kanë plotësuar peticionin.

Nga ana tjetër, edhe pse ka njerëz të pakënaqur, sezoni i tetë ka grumbulluar mesatarisht 43 milionë shikues për episod, gati 10 milionë më shumë se sezoni i shtatë.

Njerëzit kritikojnë mënyrën si janë shkatërruar karakteret. Daenerys Targaryen, sipas tyre, u kthye krejt papritur në Mad Queen (Mbretëresha e Çmendur) dhe nuk ka një linjë të detajuar të ndryshimit të figurës së saj. Po kështu, Brienne u transformua nga një luftarake e zonja në një personazh që i lutet dikujt për të mos e lënë vetëm. Momente kyçe mbeten të pashpjeguara: si shkoi Arya te Night King, kush ishte Night King, ç'kuptim ka kali i bardhë në serinë e pestë, pse nuk u përmbush profesia e Cersei-t etj.

“Nuk kërkojmë një fund të lumtur, kërkojmë një fund që të ketë logjikë,” shkruhet në internet.