Pas batutës për proteinat dhe një reagimi me shumë nerv, Xumi ka zgjedhur rrugën e diplomacisë – duke deklaruar publikisht se… s’ka asnjë hatërmbetje.

Në një prononcim për Bordo, ai u shpreh qartë (por me tone të lodhura sepse ka pasur shumë punë) në lidhje me mungesën e tij në prime-t e "Big Brother VIP Albania":

“Kam pasur shumë punë realisht. I kam thënë dhe Ledionit dhe produksionit që kam pasur jashtëzakonisht shumë punë. Nuk kam mundur të ha bukë e jo më të jem aty. Por me shpirt aty kam qenë.”

Pastaj, për të shmangur çdo tension të mundshëm që mund të endet ende në atmosferë:

“Unë me Ledionin dhe Sarën jemi miq ekstrem shumë të mirë. Madje, madje – nuk i dihet – mund të na shikoni në ndonjë projekt të bukur në të ardhmen. Kam shumë respekt për Ledionin dhe për Sarën.”

Tani mbetet të shohim nëse këtë verë do të kemi ndonjë projekt të përbashkët mes Xumit, Ledionit dhe Sarës. Ose ndonjë reklamë proteinash. Sepse realisht, në estradën shqiptare, çdo gjë është e mundur.

Një rikujtesë e vogël:

Gjithçka nisi më 26 prill, në post-Big Brother. Gjatë një bisede me fituesin e edicionit, Gjesti, i cili tha se kishte humbur peshë nga mungesa e proteinave, Ledioni nuk e mbajti dot për vete dhe lëshoi një batutë: “Mos i pi ato se ato janë pisllëqe. Ai që do pinte proteinë dhe do fikte dritat e BBVA, sonte nuk është.” E kishte për Xumin, që atë natë nuk u shfaq në studio.

Disa orë më vonë, Xumi reagoi në Instagram, duke theksuar që:

1. Ka treguar respekt për të gjithë
2. Proteinat janë shkencërisht të certifikuara, jo pisllëqe
3. Ka derdhur djersë e mund për të arritur ku është

E pastaj hyri nusja me lekë në mes. Jo figurativisht, por fjalë për fjalë: “Mbase më qëllon dhe mua nusja me lekë në të ardhmen.”