Ceremonia madhështore e hapjes së Kupës së Botës 2026 në Mexico City solli në skenë emra të mëdhenj të muzikës si J Balvin, Maná, Lila Downs dhe Shakira. Por, ndërsa miliona tifozë prisnin të shijonin spektaklin, një tjetër “show” nisi menjëherë pas përfundimit të eventit dhe bëhet fjalë për teoritë konspirative në rrjetet sociale.
Shumë përdorues në internet nisën të pretendojnë se personi që interpretoi himnin zyrtar të turneut, “Dai Dai”, nuk ishte në të vërtetë Shakira, por një sozi e saj.
Komentet u përhapën me shpejtësi në X, TikTok dhe platforma të tjera, ku disa përdorues argumentonin se këngëtarja dukej ndryshe nga zakonisht. Sipas tyre, lëvizjet në skenë nuk i ngjanin energjisë karakteristike të artistes kolumbiane, ndërsa flokët, fytyra dhe madje edhe mënyra e ecjes u bënë objekt diskutimi.
“Kjo nuk është Shakira. Shikoni si humbet ekuilibrin gjatë performancës”, shkroi një përdorues, duke ndezur edhe më shumë debatin online.
Në performancë, Shakira u shfaq me një kostum të verdhë tërheqës, pantallona të shkurtra të bardha, atlete me platformë dhe syze dielli të errëta. Pikërisht syzet, së bashku me modelin e flokëve dhe pamjen paksa ndryshe nga ajo që publiku është mësuar të shohë, ushqyen spekulimet.
Megjithatë, fansat e artistes nxituan të kundërshtojnë teorinë. Ata vunë re një detaj shumë specifik: një shenjë të vogël në ballin e Shakirës, e cila duket qartë edhe në një fotografi të fundit të saj. E njëjta shenjë, sipas tyre, ishte e dukshme edhe gjatë ceremonisë, duke dëshmuar se në fushë ishte vetë këngëtarja.
Sigurisht, teoritë më ekstreme vazhdojnë të qarkullojnë. Disa pretendojnë se një sozi mund të kishte studiuar për muaj të tërë lëvizjet, koreografitë dhe pamjen e artistes për të mashtruar publikun.
Ndërkohë, kënga “Dai Dai”, të cilën artistja e interpreton së bashku me reperin Burna Boy, ka thyer rekorde duke kaluar 100 milionë shikime edhe para nisjes së turneut. Me këtë paraqitje, Shakira forcon edhe më shumë statusin e saj si artistja femër më ikonike në historinë e Kupës së Botës, duke marrë pjesë në katër edicione të ndryshme të turneut.
Por mesa duket, këtë herë nuk ishte performanca ajo që pushtoi internetin, por pyetja që vazhdon të qarkullojë në rrjet: A ishte vërtet Shakira në ceremoninë e hapjes së Kupës së Botës 2026?
