Në MTV Video Music Awards 2020, Bella Hadid u stilua nga Carlos Nazario, ndërkohë që veshja u realizua nga Nensi Dojaka, një dizajnere e talentuar shqiptare, nga Tirana, e cila ka përfunduar studimet për modë në Londër.

“Bella Hadid bëri ëndrrat e mia realitet. Jashtëzakonisht mirënjohëse. Kaq shumë dashuri. Bella në VMAs me një veshje nga koleksioni Vjeshtë-Dimër 2020 i shfaqur në Fashion East.” – shkruan Nensi.

Fashion East funksionon si një formë skeme mbështetëse dhe prezantuese për dizajnerët e rinj. Tre vite më parë, Nensi përfundoi studimet Bachelor në Kolegjin e Modës në Londër, ndërsa së fundmi sapo është diplomuar në studime pasuniversitare edhe në Central Saint Martins, pjesë e Universitetit të Arteve në Londër.

Nensi Dojaka

Në një intervistë për Forbes, Nensi thotë se “kujtimi i parë i modës është një fustan Miu Miu, të cilin ia bënë dhuratë për 16-vjetorin”. Përsa i përket dizajnerët që e kanë frymëzuar, Dojaka përmend Helmut Lang, Ann Demeulemeester, Alessandro Dell'acqua. “Më pëlqejnë elementët e vargjeve poetike. Është vërtet frymëzuese për mua,” shtoi ajo për Forbes.

Për krijimet e saj, Nensi duket se frymëzohet nga estetika e viteve ’90.

“Kam shfletuar shumë revistat e viteve ’90 sepse i dua veshjet, estetikën e atyre viteve, madje edhe mënyrën e shkrepjes së fotove. Ka diçka të papërpunuar që dua ta rikthej. Kështu që i referohem viteve ’90 në shumë detaje, por që janë të përziera me pëlhurat e mia dhe shijet personale.”

Për 26-vjeçaren, një grua që vesh krijimet e saj është një grua me vetëbesim që nuk ka frikë të duket ndryshe dhe të thyejë konceptin e një “veshjeje të bukur”.