Ish-presidenti francez Nicolas Sarkozy është dënuar me burg në Paris! Një gjykatë e dënoi me pesë vjet për komplot kriminal, lidhur me një skemë për të marrë fonde për fushatën elektorale nga regjimi i ish-diktatorit të Libanit, Muammar Gaddafi.
Nicolas Sarkozy, i krahut të djathtë, që drejtoi vendin midis viteve 2007 dhe 2012, është ish-kreu i parë i një vendi të BE-së që shkon në burg dhe i pari lider francez pas Luftës së Dytë Botërore që dënohet me burgim.
Sarkozy, i cili ka apeluar vendimin, u përpoq të shmangte fotografimin në dyert e burgut “La Santé” në jug të Parisit. Në vend të kësaj, ai organizoi një dalje të kujdesshme nga shtëpia e tij në perëndim të kryeqytetit, ku u shfaq bashkë me bashkëshorten e tij, këngëtaren Carla Bruni, për të përshëndetur turmat e mbledhura jashtë.
Fillimisht, fëmijët e tij, dolën për të përshëndetur mbështetësit. Louis Sarkozy, një nga djemtë e ish-presidentit, i cili po përgatitet të kandidojë për kryetar bashkie në Menton gjatë pranverës së ardhshme, kishte bërë thirrje që mbështetësit të dilnin në rrugë. Disa prej tyre brohorisnin “Nicolas! Nicolas!”.
Në të njëjtën kohë, në rrjetet sociale e Sarkozy-t, u publikua një mesazh ku ai shkruante: “Jam i pafajshëm” dhe e quante burgosjen e tij një “skandal gjyqësor”.
Nicolas Sarkozy u shpall fajtor muajin e kaluar. Gjykatësja kryesore, Nathalie Gavarino, arsyetoi dënimin me 5 vjet burg, duke thënë se faktet e çështjes ishin me “rëndësi të jashtëzakonshme” dhe se mund “të cenonin besimin e qytetarëve”.
Avokatët e Sarkozy-t paraqitën menjëherë një kërkesë për lirimin e tij sapo ai hyri në burg dhe gjykata e apelit ka dy muaj kohë për ta shqyrtuar kërkesën. Në raste të tilla, gjykata mund të vendosë për lirimin me mbikëqyrje gjyqësore ose arrest shtëpie. Ajo mund të vendosë gjithashtu të mos e lirojë të dënuarin, për shembull, nëse gjykon se kjo është mënyra e vetme për të parandaluar manipulimin e provave ose kanosjen e dëshmitarëve.
Gjatë gjyqit tremujor, prokurori publik i kishte thënë gjykatës se Nicolas Sarkozy kishte bëri një “pakt faustian korrupsioni me një nga diktatorët më të pamëshirshëm të 30 viteve të fundit”, për të siguruar financime zgjedhore nga Gaddafi.
Nicolas Sarkozy u shpall i pafajshëm për tre akuza të tjera: korrupsion, keqpërdorim të fondeve publike nga Libia dhe financim të paligjshëm të fushatës elektorale.
Në gjyq, ai mohoi çdo akuzë dhe tha se nuk ishte pjesë e ndonjë komploti kriminal për të kërkuar fonde nga Libia dhe avokatët e tij apeluan vendimin. Një gjyq i ri pritet të mbahet pas rreth 6 muajsh, por natyra e dënimit të tij kërkon që ai të kryejë dënimin, ndërkohë që procesi i apelimit vazhdon.
Nicolas Sarkozy i tha gazetës Le Figaro se kishte marrë me vete fotografi familjare dhe tre libra të lejuar gjatë javës së parë, përfshirë një biografi të Jezusit dhe “Kontin e Monte Kristos” të Alexandre Dumas, romani ku një burrë i pafajshëm dënohet padrejtësisht, por arratiset për t’u hakmarrë. Ai tha se do ta përdorë kohën në burg për të shkruar një libër.
Pritet që ai të mbahet në izolim për arsye sigurie, në një qeli individuale rreth 9 metra katrorë, me dush dhe tualet privat. Nuk do të ketë telefon, por do të ketë një televizor të vogël. Një linjë telefoni e kontrolluar nga autoritetet do t’i lejojë të komunikojë me familjen dhe avokatët. Ai do të ketë të drejtë për dy vizita familjare në javë. Sarkozy tha se i ishte këshilluar të merrte tapa për veshët, sepse “natën dëgjohen shumë zhurma, britma, ulërima”.
Megjithatë, Sarcozy ende gëzon mbështetje në të djathtën franceze. Presidenti aktual, Emmanuel Macron e priti Sarkozy-n në pallatin Élysée të premten, veprim që ai e mbrojti publikisht të hënën:“Ishte e natyrshme, në nivel njerëzor, që të pranoja një nga paraardhësit e mi në këtë kontekst,” tha presidenti Macron.
