Europianët thonë se figura opozitare ruse, Navalny, është vrarë nga toksina e gjetur në një bretkosë helmuese
Lideri i opozitës ruse, Alexei Navalny, dyshohet se vdiq në burg pasi u helmua me epibatidinë, një toksinë vdekjeprurëse që gjendet te bretkosat e quajtura “dart frog” në Amerikën e Jugut, sipas Britanisë dhe aleatëve europianë.
Zyrtarët europianë thanë se nuk ka asnjë shpjegim të pafajshëm për praninë e kësaj toksine, e cila nuk gjendet natyrshëm në Rusi, duke fajësuar drejtpërdrejt Kremlinin. Rusia ka mohuar akuzat, ndërsa bashkëshortja e të ndjerit, Yulia Navalnaya, deklaroi se analizat perëndimore vërtetojnë shkencërisht se bëhet fjalë për vrasje të qëllimshme.
Alexei Navalny ishte në burg duke vuajtur një dënim të kombinuar prej 30 vjetësh e gjysmë me akuza për ekstremizëm dhe mashtrim, të cilat ai dhe mbështetësit e tij i konsideronin të motivuara politikisht për shkak të kritikave të tij të forta ndaj Kremlinit. Ai u transferua në një burg të sigurisë së lartë mbi Rrethin Arktik dhe bëri thuajse tre vite në burg para vdekjes së tij në shkurt të vitit 2024.
Tubime të mbajtura në të gjithë botën në mbështetje të protestuesve antiqeveritarë të Iranit
Qindra mijëra njerëz protestuan në qytete të ndryshme të botës në mbështetje të demonstruesve antiqeveritarë në Iran, të cilët po përballen me represion të ashpër dhe vdekjeprurës nga regjimi.
Në një tubim me rreth 200 mijë vetë në Mynih, Reza Pahlavi, djali i shahut të fundit të Iranit, u shpreh i gatshëm të udhëheqë vendin drejt një “të ardhmeje laike dhe demokratike”.
Ndërkohë, SHBA-ja po përgatitet për bisedime të reja me Teheranin për çështjen bërthamore, ndërsa organizatat e të drejtave të njeriut raportojnë mijëra të vrarë dhe dhjetëra mijëra të arrestuar gjatë protestave.
CIA publikon video rekrutimi për ushtarët kinezë të pakënaqur
Central Intelligence Agency (CIA) ka publikuar një video në gjuhën kineze për të bindur ushtarët kinezë të pakënaqur që të bashkëpunojnë me SHBA-në, duke paraqitur historinë e një oficeri që zhgënjehet nga korrupsioni dhe interesat personale të udhëheqësve të tij.
Kjo vjen në një moment kur ushtria kineze po përballet me hetime dhe spastrime të brendshme për korrupsion, të nisura nga presidenti Xi Jinping ndaj gjeneralëve të lartë. Kina ka reaguar duke paralajmëruar se do të marrë masa kundër çdo përpjekjeje për infiltrimin e saj nga shërbimet e huaja.
Murali gjigandi i Maria Callas në Greqi fiton çmimin botëror të artit të rrugës
Një mural gjigant i sopranos legjendare Maria Callas në qytetin grek Kalamata është votuar si arti më i mire i rrugës në botë nga ndjekësit e platformës Street Art Cities.
Vepra e artistit Cleomenis Kostopoulos e paraqet Callas si një alegori të qytetit, ku fustani i saj simbolizon lulëzimin, begatinë dhe tokën e bekuar të rajonit.
Autoritetet lokale thonë se murali është kthyer në një pikë të re turistike dhe po ndihmon në promovimin ndërkombëtar të Kalamatës.
