Protesta kundër lëvizjeve të fundit të administratës amerikane në Danimarkë dhe Itali
Qindra veteranë danezë, shumë prej të cilëve luftuan përkrah trupave amerikane, organizuan një protestë të shtunën jashtë Ambasadës Amerikane në Kopenhagen.
Protesta u zhvillua kundër komenteve të administratës Trump, të cilat nënvlerësonin kontributin e tyre në luftime, si dhe ndaj kërcënimeve për marrjen nën kontroll të Groenlandës.
Ndërkohë, në Milano qindra protestues kundërshtuan praninë e agjentëve amerikanë të ICE-së gjatë Lojërave Olimpike Dimërore, duke u shprehur të shqetësuar për të drejtat dhe simbolikën antifashiste të qytetit.
Raportohen shpërthime në Iran, Izraeli mohon përfshirjen
Një shpërthim i fuqishëm në një ndërtesë tetëkatëshe tronditi qytetin bregdetar në jug të Iranit, Bandar Abbas, ditën e djeshme.
Organizata e Menaxhimit të Krizave të Hormozganit tha se 14 persona u plagosën dhe tragjikisht, një vajzë 4-vjeçare humbi jetën.
Zyrtarisht ngjarja është raportuar se ndodhi si pasojë e një rrjedhjeje gazi, megjithëse qarkullojnë dyshime dhe raportime për shpërthime të ngjashme edhe në qytete të tjera, të cilat autoritetet i kanë mohuar ose i kanë lidhur me zjarre aksidentale, por Izraeli mohoi çdo zë që e akuzonte për përfshirje.
Keir Starmer i bën thirrje Andrew të dëshmojë në SHBA për lidhjet me Jeffrey Epstein
Keir Starmer tha Andrew Mounbatten-Windsor duhet të dëshmojë para Kongresit Amerikan mbi lidhjet e tij me Jeffrey Epstein, duke theksuar se prioriteti kryesor i kësaj çështjeje duhet të jenë viktimat.
Thirrja vjen pas publikimit të dosjeve të reja të Epstein nga Departamenti Amerikan i Drejtësisë, ku Andrew përmendet gjerësisht dhe shfaqet në dokumente, email-e dhe fotografi që e lidhin me çështjen.
Andrew Mountbatten-Windsor ka mohuar çdo shkelje, por më herët ka paguar një marrëveshje jashtëgjyqësore prej rreth 12 milionë paundësh, ndërsa hetimet kanë zbuluar lidhje të Epstein me figura të tjera të njohura britanike.
Protestuesit do të kërkojnë dorëheqjen e politikanit hungarez për komentin kundër komunitetit rom
Mijëra njerëz pritet të mblidhen në Budapest për të kërkuar dorëheqjen e politikanit hungarez János Lázár, për shkak të një komenti racist kundër komunitetit rom të bërë gjatë muajit të shkuar.
Gjatë një forumi politik ku fliste mbi migrimin dhe mungesën e fuqisë punëtore në vend ai u shpreh se meqenëse nuk kishte emigrantë dhe dikush duhet të pastronte banjot në trenat InterCity, romët duhet ta bënin atë punë.
Kjo deklaratë e filmuar u shpërnda kudo dhe nxiti shumë reagime nga organizatat dhe politikanët, por edhe pse János Lázár kërkoi falje, ai refuzoi të japë dorëheqjen, ndërkohë që njerëzit e këtij komuniteti vazhdojnë të përballen me varfëri, kushte të vështira jetese dhe diskriminim.
