Hailee Steinfeld ka një lajm të mrekullueshëm, ajo është shtatzënë! Aktorja ka zbuluar se po pret fëmijën e saj të parë me bashkëshortin, sportistin e njohur Josh Allen, përmes një postimi të publikuar të premten.
Teksa ndante një listë me “29 momentet që kam dashur këtë vit”, për të festuar ditëlindjen e saj të 29-të të enjten, Steinfeld publikoi një video ku Allen e puth në barkun e rrumbullakosur. Në pamje, çifti shihet duke u përqafuar, duke u puthur dhe duke treguar barkun e saj.
Steinfeld kishte veshur gjithashtu një xhaketë të zezë me fjalën “mami” të shkruar mbi të.
Aktorja ngjalli më herët dyshime për shtatzëni gjatë paraqitjes së saj në tapetin e kuq të ceremonisë së Çmimeve të Guvernatorëve më 16 nëntor, falë një fustani me pala të formësuara që i mbulonin barkun. Zgjedhja bëri që shumë përdorues në rrjetet sociale të aludonin se bëhej fjalë për një shtatzëni të fshehur.
Në atë kohë, këngëtarja dhe aktorja ishte pothuajse gjashtë muaj e martuar me Allen. Çifti u martua në fund të majit në Montecito, Kaliforni, pasi sportisti i propozoi asaj gjashtë muaj më parë.
Steinfeld dhe Allen u lidhën në maj të vitit 2023. Ata e mbajtën lidhjen larg vëmendjes publike dhe e konfirmuan zyrtarisht vetëm pas një viti.
Steinfeld është shpesh e pranishme në ndeshjet e bashkëshortit të saj. Në një intervistë të dhënë në nëntor, ajo foli për marrëdhënien e tyre, duke e quajtur Allen “mbështetjen” e saj, një pjesë e qëndrueshme dhe e sigurt e jetës së saj.
“Gjeta personin tim dhe është gjëja më e bukur në botë,” u shpreh ajo. “Jeta merr kuptim. Çdo gjë merr kuptim.”
