Homazhe dhe dhimbje: Përcillet për në banesën e fundit Shpat Kasapi!

Gjatë ditës së sotme po kryhen nderimet për të përcjellë për në banesën e fundit këngëtarin Shpat Kasapi, i cili ndërroi jetë në moshën 40-vjeçare, nga një sulm në zemër.
 
Ceremonia mortore po zhvillohet në qytetin e tij të lindjes, Tetovë, ndërsa këngëtari i ndjerë po nderohet nga familjarët, ish-bashkëshortja, Selvija, miq, të afërm dhe fansa. Arkëmorti i tij u mbulua me flamurin kombëtar shqiptar, ndërsa njerëzit po i bëjnë homazhe në Pallatin e Kulturës.
 
Shpati do të varroset në varrezat e Tetovës, në orën 14:00.
 
Humbja e tij tronditi thellë showbiz-in shqiptar, pasi lajmi ishte krejt i papritur. Ai ndodhej me ish-bashkëshorten dhe djalin e tyre të vogël në Bolonjë, Itali, për një kontroll mjekësor për të birin. Shpati pësoi sulm në zemër dhe sipas Selvijes, ndërroi jetë në praninë e saj.