Një emër i madh i kinematografisë europiane do t’i bashkohet sezonit të ri të serialit të suksesshëm “The Morning Show”, krah Jennifer Aniston dhe Reese Witherspoon: bëhet fjalë për aktoren franceze Marion Cotillard, e cila do të interpretojë një figurë të fuqishme të botës së medias.
Por, ndonëse talenti i Cotillard nuk vihet në dyshim, përzgjedhja e saj në këtë rol ka ndezur një teori intriguese të publikuar nga tabloidi britanik Daily Mail: pas kësaj zgjedhjeje fshihet një histori e vjetër, me përplasje të nënkuptuara mes Jennifer Aniston dhe Angelina Jolie, si dhe që Cotillard mund të jetë “asi nën mëngë” në një hakmarrje të vonuar.
Sipas artikullit, Cotillard është e vetmja grua për të cilën Angelina Jolie ka shfaqur ndonjëherë xhelozi, ndërsa ishte në një marrëdhënie me Brad Pitt. Gjatë xhirimeve të filmit “Allied” (2016), Jolie thuhet se kishte dyshime serioze për një afrimitet mes Pitt dhe koleges së tij, Marion Cotillard, çka u përfol se ndikoi në krisjen e martesës së tyre.
Një burim anonim për Daily Mail shprehet:
“Brad ishte i tërhequr nga eleganca dhe stili francez i Marion-it. Ajo është ndoshta gruaja që Angelina e urren më shumë se këdo tjetër. Ishte hera e vetme kur ajo tregoi hapur xhelozi. Situata ishte e tensionuar. Jolie e kishte ende të freskët mënyrën se si nisi romanca me Pitt gjatë xhirimeve të Mr. & Mrs. Smith, ndaj kishte frikë se historia po përsëritej.”
Mediat amerikane, si Page Six e New York Post, raportuan më herët se ndarja e Jolie dhe Pitt erdhi pas një përplasjeje të ashpër në një avion privat, zyrtarisht për arsye që lidhen me rritjen e fëmijëve. Por sipas burimeve të ndryshme, Jolie kishte punësuar një hetues privat për të ndjekur Pitt gjatë xhirimeve të Allied, pasi ka dyshuar për një lidhje me Cotillard. Aktorja franceze dhe partneri i saj, regjisori Guillaume Canet, i kanë mohuar kategorikisht këto zëra.
Ndërkohë, përfshirja e Cotillard në “The Morning Show” pritet të sjellë jo vetëm risi në serial, por edhe të rizgjojë interesin e publikut për dramën e vjetër hollivudiane.
